Kryetarja e Komunës së Preshevës, Ardita Sinani, sot ka pritur në takim Zëvendëskryeministrin për Çështje Evropiane të Maqedonisë së Veriut, z. Izet Mexhiti, i shoqëruar nga një grup bashkëpunëtorësh të tij.
Delegacioni i udhëhequr nga Mexhiti e që zgjodhi këtë fundjavë ta kalojë në Preshevë, përfshinte edhe këshilltaren për arsim Miqereme Rusi, zëvendësministrin e Punëve të Brendshme Astrit Iseni, dhe deputeten e Feride Haxhiu.
Gjatë takimit, Sinani theksoi rëndësinë e rritjes së bashkëpunimit ndërkufitar dhe zhvillimit ekonomik të zonës, duke vënë fokus në mundësitë që ofron Zona Industriale e Preshevës.
Ajo u shpreh se është e rëndësishme që investitorët nga Maqedonia e Veriut të përfshihen në zhvillimin e kësaj zone, duke hapur mundësi të reja për punësim dhe rritje të investimeve.
Një tjetër temë që mori vëmendje ishte mbështetja për të rinjtë e Luginës së Preshevës, veçanërisht për ata që duan të ndjekin studimet universitare në Maqedoninë e Veriut, duke u diskutuar për mundësinë e ofrimit të bursave dhe akomodimit për studentët, si një mënyrë për të inkurajuar arsimin dhe zhvillimin e brezit të ri.
Në vazhdim ju sjellim postimin e plotë të kryetares së Komunës së Preshevës, Ardita Sinani, të publikuar në Facebook:
Në Komunën e Preshevës pritëm në një vizitë vëllazërore zëvendëskryeministrin për Çështje Evropiane të Maqedonisë së Veriut, z. Izet Mexhiti, së bashku me bashkëpunëtorët e tij: znj. Miqereme Rusi – këshilltare për arsim, z. Astrit Iseni – zëvendësministër i Punëve të Brendshme dhe znj. Feride Haxhiu – deputete në Kuvendin e Maqedonisë së Veriut.
Bashkëbisedimi ynë u fokusua në rritjen e bashkëpunimit ndërkufitar dhe zhvillimin ekonomik të zonës, me theks të veçantë në përfshirjen e investitorëve nga Maqedonia e Veriut në Zonën Industriale të Preshevës, si dhe në mundësitë për realizimin e projekteve të përbashkëta përmes fondeve ndërkombëtare.
Diskutuam gjithashtu për hapjen e vendkalimit kufitar Miratoc–Llojan, si një hap strategjik që do të lehtësonte qarkullimin e lirë të njerëzve dhe mallrave dhe do të sillte përfitime konkrete për qytetarët tanë.
Në qendër të vëmendjes ishte edhe arsimimi universitar i të rinjve nga Lugina e Preshevës, ku u diskutuan mundësitë për mbështetje me bursa dhe akomodim për studentët që ndjekin studimet në Maqedoninë e Veriut.
Kjo vizitë vëllazërore rikonfirmon vullnetin e përbashkët për bashkëpunim afatgjatë dhe përkushtimin për zhvillimin e ndërsjellë të zonave tona.