10:33 • Seanca e V-të e Kuvendit të Komunës së Preshevës e cila është ftuar për sot, ka filluar punimet me 30 minuta vonesë.
Për arsye jo të ditura për publikun, seanca e V-të e Kuvendit të Komunës së Preshevës ka filluar punimet me 30 minuta vonesë.
Për këtë seancë janë propozuar 5 pika të rendit të ditës për diskutim, nga të cilat dy janë rreth binjakzimit të Preshevës me komunën e Çairit dhe Likovës, propozim vendimi për organizimin dhe funksionimin e sigurisë civile në territorin e komunës së Preshevës, rishikimi i buxhetit të Komunës së Preshevës për vitin 2021 si dhe pyetjet e këshilltarëve. Pika më e nxehtë gjatë kësaj seance pritet të jetë rishikimi i buxhetit.
10:47 • Me propozim të këshilltarit të koalicionit qeverisës, Naser Aziri, në rend të ditës është shtuar pika për informimin rreth çështjes së procesit në lidhje me vërshimet e ndodhura në fshatrat Raincë dhe Rahovicë
Sikurse që ka premtuar në seancën e kaluar, Naser Aziri, këshilltarë në Kuvendin e Komunës së Preshevës nga ana e Unionit Demokratik Shqiptar, ka përsëritur kërkesën që gjatë kësaj seance të diskutohet rreth proçesit dhe të arriturave në çështjen e kompenzimit të dëmeve të shkaktuara nga vërshimet e fundit në fshatrat Rahovicë dhe Raincë.
Pas diskutimit rreth pikave të rendit të ditës për seancën e V-të të Kuvendit të Komunës së Preshevës, me 37 vota për, është vendosur që diskutimi rreth propozimit të këshilltarit të UDSH-së të ndodhin në fund të seancës, respektivisht është vendosur që kjo pikë të mbetet e fundit.
Ndryshe, Unioni Demokratik Shqiptar është njëra nga partitë partnere në koalicionin qeverisës në Preshevë së bashku me PVD, PDSH dhe LR e që udhëhiqet nga kryetarja e Komunës së Preshevës, Ardita Sinani.
11:23 • Seanca fillon me diskutime të mëdha rreth vendimit për binjakzimin e Komunës së Preshevës dhe asaj të Çairit
Këshilltarët e opozitës në Kuvendin e Komunës së Preshevës kanë dalur kundër vendimit për thellimin e bashkëpunimit dhe shoqërorizimit të komunës së Preshevës dhe të Çairit.
Shefi i gurpit të këshilltarëve të APS-së, Amir Latifi, gjatë diskutimit të tij në lidhje me binjakëzimin e komunës së Preshevës me komunën e Çairit dhe Likovës, ka parashtruar pyetjen se pse Presheva po vazhdon të binjakëzohet me komuna të varfura, derisa këshilltari i APN-së, Argjend Sherifi ka kundërshtuar këtë vendim duke përmendur keqmenaxhimin e këtyre dy komunave shqiptare në Maqedoninë e Veriut.
Me 22 vota për, asnjë kundër dhe asnjë të përmbajtur, Kuvendi i Komunës së Preshevës ka votuar vendimin për të binjakzuar komunën e Preshevës me atë të Çairit dhe Likovës.
11:45 • Kryetarja e Preshevës, Ardita Sinani, fillon prezentimin e rishikimit të buxhetit të Komunës së Preshevës
Diskutimin për pikën e rendit të ditës rreth vendimit për rishikimn e buxhetit të Komunës së Preshevës për vitin 2021, ka hapur kryetarja e Komunës së Preshevës, Ardita Sinani, me ç`rast ka paraqitur ndryshimet e parapara me rishikim dhe arsyet që kanë sjellur deri te nevoja për rishikim të buxhetit komunal.
12:12 • Kryetari i Kuvendit të Komunës së Preshevës ndërpret seancën
Pas prezentimit të ndryshimeve në buxhetin komunal të Preshevës nga ana e Sinanit, fjalën për të diskutuar e ka marrë këshilltarja e APN-së, Almina Iljazi, me ç`rast pas pyetjes së sajë për mungesën e kryetares Sinani ose zëvendësit të saj Mustafa, kryetari i Kuvendit të Preshevës, Sami Salihu, ka ndërpre senacën duke e çuar në pauzë prej 5 minutave derisa të kthehet kryetarja Sinani në senacë.
Alternativa për Ndryshim në Preshevë gjatë seancës së tretë të Kuvendit të Komunës së Preshevës, më 6 korrik kishin penguar fjalimin e kryetares së Komunës së Preshevës, Ardita Sinani, në shenjë proteste.
Këshilltarët e APN-së, në shenjë proteste kundër “fjalorit të saj dhe shpifjeve ndaj qytetarëve të komunës së Preshevës” siç pretendonin ata, kishin protestuar në seancë duke fishkëlluar për të pamundësuar diskutimin e kryetares Sinani në Kuvend.
APN gjithashtu kishin premtuar se nuk do të tërhiqen nga veprimi për të pamundësuar diskutimin e Sinanit në Kuvend, derisa ajo nuk do të kërkojë falje.
“Në seancën e fundit të kuvendit komunal këshilltarët e ALTERNATIVËS për Ndryshim kërkuan nga kryetarja jolegjitime të kërkoj falje për fjalorin e saj dhe shpifjet ndaj qytetarëve të komunës së Preshevës, pas skandaleve duke i quajtur qytetarët kafshë, akuza ndaj këshilltarëve të ALTERNATIVËS për Ndryshim, kërcënimeve në telefon dhe shpifjen e fundit duke shpifur për amoralitet në kabinetin e kaluar të komunës së Preshevës. Këshilltarët e ALTERNATIVËS për Ndryshim nuk do të ndalen së protestuari në kuvend deri sa kryetarja jolegjitime e komunës Ardita Sinani nuk kërkon falje për fjalorin e saj.” thuhej në postim të kësaj video të publikuar në faqen e APN-së në facebook.
Por, ajo që u pa sot gjatë seancës së V-të të Kuvendit të Komunës së Preshevës, është se këshilltarët e APN-së janë tërhequr nga vendimi për të i pamundësuar pjesëmarrjen kryetares Sinani në punimet e Kuvendit të Komunës së Preshevës.
13:30 • Kuvendi vazhdon punimet në kuadër të seancës së V-të
Kryetari i Kuvendit të Komunës së Preshevës, Sami Salihu, ka vazhduar seancën e V-të duke kërkuar kujdes nga këshilltarët e Kuvendit të i shmangen përplasjeve të panevojshme gjatë diskutimeve dhe që diskutimi të përqëndrohet në rendin e ditës.
Diskutimet kanë vazhduar me fjalën e këshilltares së APN-së, Almina Iljazi, e cila gjatë diskutimit ka potencuar se ndryshimet në buxhet janë parapri nga tejkalimi i shpenzimeve të udhëtimeve dhe kontratave. Pas Iljazit diskutimet rreth rishikimit të buxhetit të Komunës së Preshevës po vazhdojnë nga ana e këshilltarëve të opozitës të cilët po kritikojnë ndryshimet e bëra në buxhet.
Pas diskutimit të gjatë prej tri orësh, rishikimi i katërt i buxhetit të Komunës së Preshevës është votuar me 21 vota.