Në selinë e Këshillit Kombëtar Shqiptar dhe kabinetin e Kryetarit të Bujanocit sot gjatë vizitës së parë në këtë komunë, qëndruan shefi i zyrës se Këshillit të Evropës, Tobias Flessenkemper dhe asistentja e tij Mona Alghaith.
Gjatë takimeve të përfaqësuesve të Këshillit të Evropës që zhvilluan në komunën e Bujanocit, u bisedua për pozitën e shqiptarëve në Luginë të Preshevës dhe (mos)realizimin e plotë të të drejtave të pakicave.
“Mosintegrimi i shqiptarëve në institucione publike, mosrealizimi i të drejtave të garantuara me ligj dhe konventa ndërkombëtare dhe ngecja në avancimin e pozitës së shqiptarëve në Luginë të Preshevës po vazhdojnë të jenë preokupime të përditshme dhe betejë politike e institucionale e përfaqësuesve shqiptarë”, thuhet në njoftimin e të parit të Komunës së Bujanocit, z.Shaip Kamberi.
Kamberi gjatë takimit ka theksuar se prezenca dhe përkrahja ndërkombëtare shihet si garancë e avancimit dhe realizimit të plotë të të drejtave tona kolektive. Përveç takimit me Kryetarin e Bujanocit, delegacioni i Këshillit të Evropës takoi edhe udhëheqësit e Këshillit Nacioanl Shqiptar, takim gjatë së cilit u njoftuan rreth mospërfshirjes së shqiptarëve nëpër institucionet shtetërore dhe problemet e tjera të përditshme të shqiptarëve në këtë rajon.
“Ragmi Mustafa dhe bashkëpunëtorët e tij njoftuan shefin e Këshillit të Evropës për çështje si, pasivizimi i vendbanimeve të shqiptarëve në Preshevë, Bujanoc dhe Medvegjë; mospërfshirja e shqiptarëve nëpër institucionet shtetërore; problemet në arsim si mungesa e teksteve mësimore në gjuhën shqipe; sfida qe po rëndojnë shqiptarët e Luginës së Preshevës.” thuhet në njoftimin e KNSH-së në Facebook.
Përveç njoftimeve të bëra nga i pari i Bujanocit dhe Këshilli Kombëtar Shqiptar, deri në këto momente nuk pati komunikata nga udhëheqësit e Preshevës në lidhje me këtë delegacion.