Kryetari i Komunës së Bujanocit, Arbër Pajaziti, ka sqaruar se marrëveshja e bashkëpunimit mes Komunës së Bujanocit, Komunës së Preshevës dhe Federatës Shqiptare të Futbollit (FSHF) nuk ka të bëjë me ndërtimin e një stadiumi, por me krijimin e një fushe stërvitore për të rinjtë e Luginës së Preshevës.
Në një video–selfie të publikuar nga stadiumi i KF Tërnocit, Pajaziti ka theksuar se qëllimi i këtij projekti është ngritja e një fushe që do të shërbejë për trajnimet dhe aktivitetet fizike të të rinjve nga e gjithë Lugina.
“Nuk bëhet fjalë për stadium, por për një fushë ku të rinjtë e Luginës së Preshevës do të trajnohen dhe do të zhvillojnë aktivitete fizike. FSHF ka kërkuar që kjo fushë të jetë e vendosur mes Preshevës dhe Bujanocit, në mënyrë që t’u shërbejë të gjithë fëmijëve të Luginës,” ka deklaruar Pajaziti.
Projekti, sipas tij, është një hap i rëndësishëm për të forcuar bashkëpunimin institucional në fushën e sportit dhe për të krijuar kushte më të mira për zhvillimin e talenteve të reja në sportin e futbollit.