Seanca konstituive e Kuvendit të Komunës së Preshevës është ftuar për ditën e shtunë, më 20.07.2024, me fillim në ora 10:00.
Kryetari i Organit të përkohshëm në Komunën e Preshevës, Ragmi Mustafa, ka ftuar seancën konstituive të Kuvendit të Komunës së Preshevës për të shtunën, më datë 20.07.2024.
Për rend të ditës së seancës konstituive janë paraparë 8 pika, përfshirë edhe zgjedhjen e Kryetarit, zëvendësit të tij, sekretarit dhe zëvendësit të Kuvendit të Komunës së Preshevës.
PreshevaPRESS ka kontraktuar me shumicën e partive politike në Preshevë për të konfirmuar nëse ekziston një marrëveshje politike për qeverisjen e Preshevës, por një gjë të tillë nuk e ka konfirmuar asnjëra nga partitë e kontraktuar.
Nga burimet brenda PVD-së me të cilat ka kontaktuar PreshevaPRESS, thuhet se nuk ekziston asnjë marrëveshje në të cilën është e përfshirë edhe PVD, derisa shtojnë se kryetarja Sinani, njëherit këshillëtarja e Kurtit për Luginë, i ka garantuar këshillëtarëve dhe anëtarëve të kryesisë së PVD-së, se dje nuk ka pasur asnjë takim mes Kurtit dhe një delegacioni të PDSH-së të udhëhequr nga Mustafa.
Nga burimet e kontraktuara brenda APN-së, për PreshevaPRESS konfirmojnë se Mustafa ka ftuar në takim përfaqësuesit e LR-së dhe APN-së, pasi që ka ftuar seancën, derisa thonë se para se të ftohej seanca, Mustafa është takuar me Ardita Sinanin në restoranin “Elita” në Preshevë.
Sa i përket mundësisë për koalicion mes PDSH, LR dhe APN, burimet brenda këtij blloku nuk konfirmojnë ekzistencën e një marrëveshje, duke shtuar se Mustafa ka ftuar seancën konstituive pa konsultuar askend.
Takimi mes PDSH-së, LR-së dhe APN-së, thuhet se ka përfunduar pa marrëveshje, por ftesa e seancës konstituive për të shtunën, dhe verifikimi i mandateve të këshillëtarëve të Kuvendit të Komunës së Preshevës, shton kohë edhe 30 ditë për negociatat mespartiake për krijimin e një koalicioni qeverisës në Preshevë.