Lëvizja për Reforma e Partisë Demokratike Shqiptare në Preshevë ka filluar rikonsolidimin e vet nga nëndega e fshatit Miratocë, ku edhe ka filluar rikonstruimi i LR PDSH e që paralajmërohet se do të vazhdojë edhe në nëndegët e tjera në komunën e Preshevës.
Përmes një njoftimi në faqen e Lëvizjes për Reforma të Partisë Demokratike Shqiptare në facebook, ky subjekt politik ka njoftuar se ka realizuar një takim me banorët e fshatit Miratoc, takim ky i paparalajmëruar paraprakisht.
“Pas 2 viteve nga themelimi i saj dhe pas sfidave të mëdha që kemi kaluar së bashku, si qytetarë që e duam demokracinë dhe kooperimin e brendshëm, sonte kemi filluar rikonsolidimin e Lëvizjes sonë si një frymë e re në skenën politike lokale por edhe më gjerë.” thuhet në njoftimin e këtij subjekti politik në faqen e LRPDSH në facebook.
Njoftimit për takimin e realizuar në fshatin Miratoc i janë bashkangjitur edhe disa fotografi nga takim ku ajo që bie në sy është mungesa e udhëheqësve të këtij grupimi politik, derisa këshilltari i Kuvendit Komunal nga ky subjekt, z.Avni Nuhiu nuk ka hezituar të komentojë në këtë njoftim duke i dëshiruar suksese.