Mbrëmjen e ditës së premte, Partia për Veprim Demokratik ka nominuar kryetarin e saj si kandidatin nr.1 dhe Edita Asllani si një prej kandidateve për deputete në listën e përbashkët për zgjedhjet parlamentare, derisa partitë e tjera ende nuk kanë publikuar emrat e anëtarëve të tyre për deputet në kuadër të kësaj liste.
PreshevaPRESS ka raportuar se gara dhe mospajtimet brenda APN-së për emrin e kandidatit nga radhët e kësaj partie në listën e përbashkët për zgjedhjet parlamentare, ka krijuar përçarje edhe në qeverisjen lokale në Preshevë, gjë që ka shkaktuar edhe shtyerjen e seancës së parë të Kuvendit Komunal të Preshevës për shkak të mungesës së numrave të nevojshëm për të kaluar vendimet e parapara për këtë seancë.
Edhe pse kryetarja e degës së PVD-së në Preshevë, Ardita Sinani, si dhe Kryetari aktual i Kuvendit në Preshevë, Sami Salihu, janë deklaruar se janë kundër zgjedhjeve tê jashtëzakonshme në rast të shpërndarjes së Kuvendit nëse dështon seanca e paraparë për të hënën, burimet e PreshevaPRESS brenda LRPDSH-së, thojnë se Salihu ka kërkuar nga anëtarët dhe përjrahësit e tij të bëhen gati pêr zgjedhjet e jashtëzakonshme pasi që është e pamundur sigurimi i shumicës prej 20 këshiltarë për të ndaluar shpërndarjen e Kuvendit të Preshevës ditën e hënë, më 9 mars.
Përgatitjet për dështimin e seancës së radhës dhe shpërndarjen e kuvendit janë hetuar edhe në Komunën e Preshevës, ku stafi i kryetarit Arifi kanë kopjuar dhe larguar të gjitha dokumentet nga Kabineti i kryetarit të Preshevës, Shqiprim Arifi.
Kryesia e PVD-së pas mbledhjes së sajë nuk ka përmendur në asnjë fjali situatën e krijuar në Preshevë dhe mundësinë e shpërndarjes së Kuvendit, duke koncentruar të gjithë komunikatën në përgatitjet për zgjedhjet parlamentare.
PreshevaPRESS në lidhje me situatën e krijuar pas shtyerjes së seancës së parë të Kuvendit Komunal, ka kontaktuar kryetarin e PDSH-së, Ragmi Mustafa, kryetarin e Preshevës, Shqiprim Arifi, zavendëskryetarin e APN-së, Armend Aliu, zavendëskryetarin e PDSH-së, Ilir Sadriu, por asnjëri nga të lartëpërmendurit nuk kanë treguar gatishmëri të flasin për situatën e krijuar së fundmi në qeverisjen lokale në Preshevë.