Kryetari i Këshillit Kombëtar Shqiptar në Serbi me seli në Bujanoc, Nevzad Lutfiu, ka ftuar përsëri në takim liderët politik shqiptar të Luginës.
Lajmin për një ftesë të tillë e ka publikuar vet Lutfiu duke njoftuar se ka ftuar ata për të diskutuar rreth situatës së shqiptarëve në Luginë.
“Për të diskutuar mbi situatën e shqiptarëve në Luginë, sot i bëra ftesë liderëve politik të Luginës.” ka shkruar ai në llogarinë e tij në rrjetin shoqëror facebook.
Sipas njoftimit të publikuar në faqen e Këshillit Kombëtar Shqiptar në rrjetin shoqëror facebook, ky takim është ftuat për të diskutuar dhe marrë masa për çeshtjen shqetësuese të pasivizimit të adresave dhe diskriminimin e vazhdueshëm të shqiptarëve nga institucionet publike të cilat vazhdojnë ta shkelin Kushtetutën dhe ligjet.
Në njoftimin e KKSH-së bëhet e ditur se takimet me liderët e subjekteve politike shqiptare në Luginë do të zhvillohen individualisht dhe do konkludohen me një takim të përbashkët me qëllim krijimin e një linje të përbashkët veprimi, duke mos njoftuar as për datën e takimit, e as për emrat e të ftuarve.