Shkolla fillore “Prof Ibrahim Kelmendi” në Preshevë ka filluar me procesin e zgjedhjes së udhëheqësit të këtij institucioni.
Pas emërimit përmes vendimit nga ana e Ministrit të Arsimit si ushtruese e detyrës së drejtorit në shkollën fillore “Prof Ibrahim Kelmendi” në Preshevë më 17.07.2019, Fitore Selimi i është futur garës për udhëheqësin e këtij institucioni me rëndësi jetike për Komunën e Preshevës.
Përveç ushtrueses së detyrës së drejtorit Selimi, kandidat për drejtor në këtë shkollë janë edhe Sefer Jahiu dhe Suat Agushi, të dy mësimdhënës në këtë shkollë.
Në mbledhjen e këshillit të arsimtarëve të mbajtur gjatë ditës së djeshme është votuar për te dhënë mendimin për drejtorin e shkollës për mandatin e rregullt katervjeçar.
Ushtruesja e detyrës së drejtorit, Fitore Selimi ka marrë përkrahjen nga 53% e votave të këshillit të arsimtarëve të kësaj shkolle ose në numër 92 të punësuar në këtë institucion kanë votuar për të. Prof.Sefer Jahiu ka siguruar 67 vota nga kolegët e tij apo shprehur në përqindje 39%, derisa prof. Suat Agushi është votuar nga 14 kolegë të tij e që në përqindje i bie 8%.
Sipas ligjit mbi bazat e sistemit arsimor drejtorin e zgjedh Ministri derisa merr mendim nga Këshilli Nacional Shqiptar dhe këshilli shkollës. Ky ligj është votuar në vitin 2017 në Parlamentin e Republikës së Serbisë duke u përcjellur me debate të gjata dhe kundërshtime të mëdhaja nga opozita si ligj i cili do të i mundësojë ministrit të arsimit t’a kapë sistemin dhe përmes emërimit të drejtorëve në të gjitha shkollat të punësojë militant dhe anëtarë partiak. Gjatë diskutimit të këtij ligji në Parlamentin e Serbisë janë propozuar 1400 amandamente.