Gjatë ditës së sotme ministrit në detyrë për evropën dhe punët e jashtme të Republikës së Shqipërisë, z.Gent Cakaj, ka komentuar arritjen e marrëveshjes mes disa partive politike shqiptare në Luginën e Preshevës, për listën e përbashkët të shqiptarëve në zgjedhjet parlamentare që do të mbahen këtë vit.
Ministri në detyrë Cakaj, përmes një postimi në faqen e tij në facebook ka shprehur mirënjohje për kryetarët e partive politike që kanë nënshkruar marrëveshjen, duke veçuar kryetarin e Preshevës dhe të APN-së, Shqiprim Arifi, dhe duke mos e përmendur askund as Partinë Demokratike e as kryetarin e saj Nagip Arifin.
I menjëhershëm ka qenë reagimi i liderit të Partisë për Veprim Demokratik, njëherit i përfolur si bartës i listës së përbashkët të shqiptarëve të Luginës së Preshevës në zgjedhjet parkamentare në Serbi.
Pëmes postimit në profilin e tij në facebook, Kamberi ka thënë se veçimi i cilitdo subjekt ose përfaqësuesit politik, qoftë në arritjen e marrëveshjes së mbrëmshme, apo edhe gjatë procesit në vijim (para)zgjedhor nuk do të i kontribuojë unitetit për realizimin e synimeve politike dhe interesave të shqiptarëve të Luginës së Preshevës.
Postimi i plotë i Kamberit:
Partia për Veprim Demokratik ka ripërshëndetur mbrëmë marrëveshjen politike për pjesëmarrjen e përbashkët të partive politike shqiptare të Luginë së Preshevës në zgjedhjet e ardhshme parlamentare, me kontributin e Ministrit në Detyrë për Evropën dhe Punët e Jashtme të Republikës së Shqipërisë, z.Gent Cakaj.
Kjo marrëveshje është arritur me vullnetin e lirë, mirëkuptimin dhe sidomos gatishmërinë e secilit për të vendosur interesat kombëtare përpara interesave partiake.
Prandaj, veçimi i cilitdo subjekt ose përfaqësuesit politik, qoftë në arritjen e marrëveshjes së mbrëmshme, apo edhe gjatë procesit në vijim (para)zgjedhor, nuk kontribuon në unitetin e nevojshëm për realizimin e synimeve politike dhe interesave të shqiptarëve të Luginës së Preshevës.