Kryetari i Partisë për Veprim Demokratik, njëherit edhe deputeti i vetëm shqiptar në Serbi, Shaip Kamberi, i shoqëruar me ish kryetarin e Këshillit Kombëtar Shqiptar në Serbi, Ragmi Mustafi, sot kanë takuar ambasadorin e SHBA-ve në Beograd, Christopher Hill dhe ambasadorin e OSBE-së në Serbi, Jan Braathu.
Kamberi përmes një postimi në facebook, ka shkruar se pozita e vështirë e shqiptarëve të Luginës së Preshevës dhe nevoja për ndërmarrjen e masave urgjente për përmirësimin e pozitës së vështirë të shqiptarëve të Luginës, ishin tema të takimit.
Në vazhdim ju sjellim postimin e plotë të Kamberit në facebook:
Drekë pune me dy miqt e mëdhenjë të Luginës së Preshevës, Ambasadorin e SHBA-ve 🇺🇸, SH.T. z. Christopher R. Hill dhe shefin e Misionit të OSBE në Serbi, SH.T. z. Jan Braathu.
Pozita e vështirë e shqiptarëve të Luginës së Preshevës dhe neglizhenca e gjatë që kërkon masa urgjente të domosdoshme, ishin temat tona të përbashkëta gjatë këtij takimi.
Faleminderoj ambasadorët për angazhimin dhe përkushtimin e tyre në drejtim të avancimit të të drejtave të pakicave në vend.
Në një foto të shkrepur gjatë takimit, shihet se Kamberi ka qenë i shoqëruar nga ish kryetari i Këshillit Kombëtar Shqiptar në Serbi, Ragmi Mustafi.
Mustafi nuk ka shkruar asgjë, por vetëm e ka shpërnda postimin e Kamberit në llogarinë e tij personale në rrjetin shoqëror, facebook.