Alternativa për Ndryshim ka pranuar në heshtje keqpërdorimet e buxhetit të Komunës së Preshevës në dreka dhe darka nga kryetari i tyre Shqiprim Arifi, por si kundërsulm ka akuzuar Ardita Sinanin për të njëjtën gjë gjatë kohës kur kishte udhëhequr me Preshevën.
Pas publikimit të këtyre faturave, i pari që reagoi ishte pronari i njërit prej bizneseve lokale, produksioni “Black in White”, e që sipas tyre shumat e paraqitura në këtë denoncim kishin të bënin me realizimin e një dokumentari në lidhje me refugjatët e lindjes së mesme, projekt ky i përkrahur direkt nga vet Shqiprim Arifi, dokumentar që ishte shfaqur në Preshevë dhe në Beograd.
Pas demantimit nga ana e produksionit “Black in White”, Alternativa për Ndryshim është demantuar edhe nga Këshilli i Bashkësisë Islame në Preshevë për një faturë të publikuar. Në emër të Këshillit të Bashkësisë Islame në Preshevë ka reaguar imami i xhamisë në fshatin Corroticë, Nexhmedin Ademi. Ai përmes një postimi në llogarinë e tij në facebook ka thënë se shuma për të cilën APN aludon se Ardita Sinani kishte harxhuar në restorant për dreka dhe darka, është shuma e cila ka mbuluar gjysmën e harxhimeve të iftarit të shtruar nga KBI në Preshevë me rastin e natës së Kadrit gjatë muajit të shenjtë të ramazanit të vitit 2017.