Alternativa për Ndryshim në Preshevë ka kërkuar të thirret seancë e jashtëzakonshme e Kuvendit të Komunës së Preshevës për shkarkimin e kryetares së Komunës së Preshevës, Ardita Sinani.
PreshevaPRESS ka siguruar dokumentin ku shihen vetëm 12 nënshkrimet e para e këshilltarëve të Alternativës për Ndryshim me kërkesën për thirrjen e një seance të jashtëzakonshme, gjatë së cilës do të diskutohej pika e vetme e rendit të ditës për shkarkimin e kryetares së Komunës së Preshevës.
Lajmin për dorëzimin e kërkesës në administratën e Kuvendit komunal të Preshevës, e ka konfirmuar edhe kryetari i APN-së, Shqiprim Arifi, për shqip.com.
“Kemi mbledhur nënshkrimet për ta ndërruar pushtetin lokal në Preshevë. Ne i kemi 15 asamblistë dhe kjo gjë mund të konsiderohet e kryer”. ka thënë Shqiprim Arifi për shqip.com.
Sipas propozuesve të kërkesës, seanca e jashtëzakonshme e Kuvendit të Komunës së Preshevës kërkohet të mbahet me datë 11prill, derisa arsyeja e cekur për propozimin e rendit të ditës është mosfunksionimi i pushtetit lokal dhe për shkak të krizës institucionale.
