Në bazë të rezultateve nga zgjedhjet e kaluara lokale, në Komunën e Medvegjës dje është mbajtur mbledhja konstituive në të cilën janë emruar ekzekutivi dhe legjislativi i kësaj komune që do të udhëheqin në mandatin e ardhshëm 4 vjeçarë.
Për dallim nga përbërjet e mëparshme shqiptarët në këtë komunë pas 17 viteve mbesin pa asnjë përfaqësues në postet udhëheqëse dhe jasht koalicionit qeverisës.
Vlenë të theksohet se për dallim me përbërjen e kaluar kur shqiptarët kishin gjithsej 8 mandate, nga rezultatet e dala në zgjedhjet e fundit lokale shqiptarët arritën të marrin jo më shumë se tre mandate në Asamblenë Komunale të cilët do të jenë opozitë në Kuvendin Komunal të Medvegjës.
Në përbërjen e kaluar shqiptarët kanë qenë pjes e koalicionit qeverisës, si dhe të përfshirë në strukturat komunale, duke gëzuar postet, një ndihmës kryetar të Komunës, 2 antarë të Këshillit Komunal dhe një zëvendës Kryetarë të Kuvendit, derisa me përbërjen e re, nga sot shqiptarët e Komunës së Medvegjës nuk do ta gëzojnë asnjë nga këto poste.
Në lidhje me këtë vendim ka reaguar Partia për Veprim Demokratik duke i ftuar Ambasadat Perëndimore që të përfshihen në këtë çështje, derisa partitë tjera politike shqiptare kanë zgjedhur heshtjen në lidhje me këtë vendim i cili nuk përfshinë shqiptarët në qeverisje lokale për herë të parë pas 17 viteve.