Udhëheqësi i Frontit për Ndryshim në Bujanoc, Arbër Pajaziti, është takuar në Prishtinë me kryeministrin e Kosovës, Albin Kurti.
Pajaziti siç duket ka marrë bekimin e Kurtit dhe përkrahjen për të vazhduar me me themelimin e institucioneve lokale në Bujanoc.
Kujtojmë se udhëheqësi i Frontit për Ndryshim në Bujanoc, Arbër Pajaziti dhe Levent Qazimi bëhen përfaqësuesit e parë të APN-së, që pas mosmarrëveshjeve mes Kurtit dhe Shqiprim Arifit, priten në Kosovë nga vet kryeministri Kurti.
Për rrjedhën e takimit Pajaziti është shprehur përmes Facebookut, dhe ky është postimi i tij:
Bashkë me Leventin, sot u pritëm ngrohtësisht nga kryeministri i Republikës së Kosovës, z. Albin Kurti.
Pasi na uroi për suksesin e arritur në zgjedhjet e fundit lokale, me kryeministrin diskutuam rrjedhat aktuale politike në Bujanoc dhe Luginë.
E ritheksuam orientimin tonë për bashkëpunim të patjetërsueshëm me institucionet e Republikës së Kosovës.
Prania e Kosovës në Luginë, veçmas në Bujanoc, është imediate për qëndresën e shqiptarëve në trojet e veta.
Mbështetja e Qeverisë së Republikës së Kosovës është domosdoshmëri dhe nevojë e kohës në të cilën ndodhemi por edhe e sfidave të cilat na presin.
Një Kosovë e fuqishme, një Bujanoc stabil.