Sot, në orët e hershme të mëngjesit ka ndërruar jetë imami i xhamisë “Ibrahim Pasha” në Preshevë, Adnan ef. Ahmedi.
Edhe pse ende nuk ka njoftime zyrtare, PreshevaPRESS mëson se ai sot, në orët e para të mëngjesit, kishte kërkuar ndihmën mjekësore në shtëpinë e shëndetit në Preshevë, e që më pas është dërguar për në qendrën shëndetësore në Vrajë, ku edhe ka ndrruar jetë.
PreshevaPRESS shpreh ngushëllimet më të sinqerta familjes Ahmedi.
Adnan ef. Ahmedi lindi më 12 janar 1965 në Preshevë.
Shkollën fillore e kreu në vendlindje në vitin 1979, ndërsa të mesmen e përfundoi në vitin 1984 në Medresenë “Alauddin”. Më pas, Adnan efendiu vazhdoi studimet universitare në Universitetin “Al-Az’har” në Kajro, në të cilin diplomoi në vitin 1991.
Pas përfundimit me sukses të studimeve, Adnan ef. Ahmedi vazhdoi studimet pasuniversitare në Institutin e Studimit të Shkencave Islame të Kajros, në të cilin magjistroi më 2001, ndërsa studimet e doktoratës i përfundoi në vitin 2003.
Në fillim të vitit 2004, Adnan ef. Ahmedi emërohet si imam, hatib dhe mualim në xhaminë “Ibrahim Pasha” të Preshevës.