Këshilli Kombëtar Shqiptar (KKSh) ka shpallur rezultatet paraprake të Thirrjes për bursa studentore, të realizuar në kuadër të Fondit të Republikës së Kosovës për Luginën e Preshevës.
Sipas listës së publikuar, nga gjithsej 888 aplikime të pranuara, 683 studentë janë përzgjedhur si përfitues të bursës. Ky program synon të mbështesë studentët shqiptarë nga Lugina e Preshevës që ndjekin studimet e tyre në institucionet e arsimit të lartë.
KKSh njofton se lista është paraprake dhe u bën thirrje të gjithë aplikuesve që nuk janë përfshirë në listën e përfituesve dhe që besojnë se dokumentacioni i tyre është shqyrtuar padrejtësisht, të paraqesin ankesë. Ankesat, së bashku me dokumentacionin përkatës që mbështet pretendimet e aplikuesit, duhet të dorëzohen fizikisht në selinë e KKSh-së në Bujanoc, brenda afatit prej 8 ditësh nga data e publikimit të listës.
Ky proces është pjesë e përpjekjeve të vazhdueshme për të siguruar transparencë dhe barazi në shpërndarjen e mbështetjes financiare për studentët nga Lugina.