Përfaqësuesit politikë nga Presheva, Medvegja dhe Bujanoci vazhdojnë të kërkojnë që të drejtat që Beogradi kërkon për serbët në Kosovë të sigurohen për shqiptarët në Lugin të Preshevës.
Para takimit mes presidentit serb dhe kryeministrit të Kosovës, deputeti shqiptar në Kuvendin e Serbisë, Shaip Kamberi, thekson se reciprociteti është synim politik dhe strategjik i shqiptarëve.
Në një intervistë për Radio Kosovën, Kamberi është ankuar për, siç thotë ai, “diskriminim të ashpër” nga lidershipi shtetëror serb, me të cilin, shton ai, pothuajse çdo gjeneratë e shqiptarëve është përballur me luftën e fundit.
“Prandaj e gjithë ajo makineri politike dhe ushtarake, e cila e shtypi Kosovën për një dekadë, pas përfundimit të luftës, më së shumti u përqendrua në Luginë”, ka thënë Kamberi.
Ai thotë se shqiptarët ende përballen me “të njëjtën praktikë diskriminimi, politika imperialiste dhe hegjemoniste, të cilat Serbia ende mendon dhe shpreson t’i zbatojë për shqiptarët, veçanërisht për Kosovën”.
“Fatkeqësisht, përkundër faktit se kemi hyrë në dekadën e tretë të shekullit të 21-të, elita politike në Serbi ende nuk e ka kuptuar se koha e kolonive ka kaluar… Serbia, duke shpresuar që ta ketë ende Kosovën si koloni, vazhdon me politikë absurde, anakronike, është një politikë e bazuar në mitet dhe mitologjinë e së shkuarës”, beson Kamberi.
Ai pretendon se “demokratizimi i Serbisë” është i domosdoshëm për realizimin e të drejtave të shqiptarëve.
Kamberi ka thënë se ka kontakte të rregullta me ambasadorin amerikan në Beograd, Christopher Hill, me shefin e misionit të OSBE-së në Serbi, ambasadorin Jan Bratu, i cili po ashtu ka shërbyer në Kosovë, duke shtuar se të gjithë janë informuar për situatën në detaje.
Ai po ashtu përkujtoi se së fundmi një delegacion i shqiptarëve nga Presheva, Medvegja dhe Bujanoci ka vizituar Uashingtonin, ku janë takuar me të dërguarin e SHBA-së për Ballkanin Perëndimor, Gabriel Escobar.
“E kemi informuar për ngritjen e vetëdijes për çështjen e shqiptarëve në luginë, duke kërkuar që të përfshihet më shumë që të drejtat e shqiptarëve të Preshevës të jenë pjesë e marrëveshjes”, ka treguar ai.
Kamberi po ashtu pohon se i kanë dërguar një kërkesë me shkrim përfaqësuesve të Bashkimit Evropian, gjegjësisht të dërguarit për dialogun ndërmjet Beogradit dhe Prishtinës, Miroslav Lajçak, dhe përfaqësuesit të lartë të BE-së, Josep Borrell.
“Duke kërkuar prej tyre angazhimin maksimal për të mos lënë anash çështjen e shqiptarëve dhe për të mos lejuar ndërtimin e standardeve të dyfishta në trajtimin e minoriteteve”. Duke kërkuar, pra, ndërtimin e njëtrajtshmërisë në të drejta, që do të ishte parakusht për stabilitet mes vendeve të Ballkanit”, vlerëson Kamberi.
Megjithatë ai shprehet se ende nuk kanë marrë përgjigje.
“Ne do të vazhdojmë të lobojmë në Uashington, veçanërisht me ligjvënësit amerikanë për të çuar përpara çështjen e shqiptarëve”, tha ai.
I pyetur se “a mendon se ky projekt mund të shtyhet më tej”, Kamberi pohon se nuk shpreson që Serbia “do ta pranojë vullnetarisht”.
“Ajo do t’i pranojë këto çështje vetëm me një kusht, kur bashkësia ndërkombëtare të jetë vigjilente, qoftë edhe në mënyrë kërcënuese ndaj saj, që të respektohen standardet e BE-së, ku Serbia të paktën synon të anëtarësohet. Demokratizimi i saj do të shihet më së shumti në respektimin e të drejtave të minoriteteve”, vlerëson Kamberi.
Ai tha se është duke u bërë progres në drejtimin e duhur sa i përket dialogut, “pavarësisht se Vuçiq duket sikur është i pathyeshëm”.
“Nëse do të ketë një nënshkrim apo jo, nuk e di në mënyrë kaq të detajuar, por jam i bindur se situata rreth Ukrainës, një homogjenizim i tillë nuk ka vite në BE, një koordinim i tillë transatlantik BE-SHBA, për të gjithë Vitet e kaluara kjo nuk ka ndodhur dhe do ta detyrojë Serbinë të respektojë kushtet dhe marrëveshjen me shqiptarët”, thotë Kamberi.
Ai edhe një herë nënvizon aspiratat e përfaqësuesve politikë të shqiptarëve në jug të Serbisë: “Qëllimi ynë politik dhe strategjik është ndërtimi i reciprocitetit me të drejtat e serbëve në Kosovë”.