Kryetari i Kuvendit të Komunës së Preshevës, Agim Sabedini, ka thirrur seancën e pestë (V) të radhës së Kuvendit Komunal të Preshevës, e cila do të mbahet më 20 tetor 2025 (e hënë), duke filluar nga ora 10:00 në sallën e madhe të Kuvendit Komunal.
Në këtë seancë pritet të shqyrtohen disa çështje të rëndësishme për funksionimin dhe zhvillimin e komunës, përfshirë rishikimin e buxhetit dhe programet për vitin e ardhshëm.
Rendi i ditës për këtë seancë përfshin:
- Shqyrtimin dhe miratimin e ekstraktit të procesverbalit nga seanca e IV-të e mbajtur më 11.09.2025.
- Shqyrtimin dhe miratimin e propozim-vendimit për rishikimin e dytë të buxhetit të programuar për vitin 2025.
- Shqyrtimin dhe miratimin e programit vjetor për mbrojtjen, rregullimin dhe shfrytëzimin e tokës bujqësore për vitin 2025.
- Shqyrtimin dhe miratimin e propozim aktvendimit për shkarkimin dhe emërimin e një anëtari të Këshillit Drejtues të Qendrës për Punë Sociale në Preshevë.
- Pyetje të këshilltarëve.
Seanca pritet të jetë me rëndësi të veçantë duke pasur parasysh vendimet që ndikojnë drejtpërdrejt në financat dhe politikat zhvillimore të komunës për vitin e ardhshëm.