Me ftesë të ministrit në detyrë për Europën dhe Punët e Jashtme të Republikës së Shqipërisë, Gent Cakaj, liderët e partive politike shqiptare në Luginë udhëtojnë për Tiranë.
Në Ministrinë për Eurpoën dhe Punët e Jashtme të Republikës së Shqipërisë, ministri Cakaj nesër ka organizuar takim të përbashkët me të gjithë liderët e partive politike shqiptare nga Lugina.
Takimi ka për qëllim adresimin e kërkesës së Qeverisë së Shqipërisë për të krijuar një listë të përbashkët për zgjedhjet parlamentare në Serbi. Zgjedhjet e rregullta parlamentare në Serbi priten të mbahen në pranverën e vitit të ardhshëm.
Sipas informacioneve që ka siguruar PreshevaPRESS në Tiranë përveç kryetarëve të partive shqiptare në Luginë, janë ftuar edhe deputeti i vetëm shqiptar në Serbi z.Fatmir Hasani, kryetari i Këshillit Nacional Shqiptar Ragmi Mustafa dhe përfaqësuesi i APN-së në Medvegjë, Muharrem Salihu.
Deri më tani asnjë parti politike shqiptare në Luginë nuk është deklaruar në lidhje me zgjedhjet e ardhshme parlamentare në Serbi.
Kërkesa e ministrit Cakaj nuk është asgjë e re pasi që Shqipëria gjithmonë ka grumbulluar liderët e partive shqiptare që veprojnë në Luginë për të garuar me një listë të përbashkët, ide e cila gjithmonë ka mbetur vetëm vullnet politik por pa rezultate të unifikimit të faktorit politik shqiptar në Luginën e Preshevës.