Presidenti turk Recep Tayyip Erdogan gjatë konferencës së përbashkët me kryeministrin Edi Rama është shprehur se vlerëson luftën që vendi jonë bën kundër organizatave terroriste.
Ai u ndal edhe tek FETO, duke kërkuar që Shqipëria ta vijojë luftën kundër tyre.
“Ne vazhdojmë përpjekjet tona për të rritur vëllim tregtar në 2 mld dollarë. Diskutuam çështjen e luftës së përbashkët kundër organizata terroriste, dhe shpresoj ta vazhdojmë luftën tonë kundër FETO përmes marrëveshjeve që kemi firmosur sot”, u shpreh Presidenti turk.
Nga ana tjetër kreu i qeverisë shqiptare, Edi Rama, shprehu mbështetje në luftën kundër organizatave terroriste.
Po ashtu Rama u ndal edhe te bashkëpunimi dhe rritja e ndërveprimit ekonomik mes dy vendeve.
“Jam vërtet shumë i kënaqur që zhvilluam takimin e dytë të bashkëpunimit, ku jo vetëm konfirmuam vendosmërinë ku përforcuam karakterin e këtij bashkëpunimi, por dhe mundëm të vlerësojmë zbatimin konkret të marrëveshjeve të bëra, si dhe potencialin e jashtëzakonshëm të kësaj marrëdhënieve.
Presidenti i Turqisë e përsërit sa herë takohemi, që niveli i marrëveshjes tregtare nuk e pasqyron sa duhet marrëveshjen mes dy vendeve. Sa më shpejtë të arrijmë nivelin e 2 miliardë eurove për të shkuar në një fazë të dytë të këtyre shkëmbimeve.
Ndava me presidentin zhvillimin e turizmit në Shqipëri, një numër i lartë i turistëve turq që kanë vizituar Shqipërinë gjatë këtij viti është rritur me 85%. Duke parë dhe interesimin në rritje të operatorit turistikë të vendit mik, ne jemi besimplotë që numri i qytetarëve turq që do të vizitojnë Shqipërinë do të jetë më i lartë”, tha më tej Rama.
Por cilat janë këto marrëveshje?
-Deklarata e synimit mbi bashkëpunimin në fushën e sigurimeve në bujqësi të mbështetur nga shteti midis Ministrisë së Bujqësisë dhe Zhvillimit Rural të Republikës së Shqipërisë dhe Ministrisë së Bujqësisë dhe Pylltarisë të Republikës së Turqisë.
Zyrtarët nënshkrues:
Znj. Anila Denaj, Ministër i Bujqësisë dhe Zhvillimit Rural;
Z. Ibrahim YUMAKLI, Ministër i Bujqësisë dhe Pylltarisë së Turqisë
-Protokoll ndërmjet Ministrisë së Arsimit dhe Sportit të Republikës së Shqipërisë dhe Këshillit të Lartë të Arsimit të Republikës së Turqisë për Hapjen e Degës, Njësisë Akademike, Programeve të Studimit nga Universiteti Teknik i Stambollit në Shqipëri.
Zyrtarët nënshkrues:
Znj. Ogerta Manastirliu, Ministër i Arsimit dhe Sportit;
Z. Erol Ozvar, President i Kryesisë së Këshillit të Arsimit të Lartë e Republikës së Turqisë.
-Memorandumi i Mirëkuptimit ndërmjet Agjencisë për Media dhe Informim të Republikës së Shqipërisë dhe Drejtorisë së Komunikimit të Presidencës së Republikës së Turqisë për bashkëpunim në fushën e marrëdhënieve me publikun dhe komunikimin.
Zyrtarët nënshkrues:
Z. Alteo Hysi, Drejtor i Përgjithshëm i Agjencisë për Media dhe Informim;
Z. Fahrettin Altun, Drejtor i Komunikimit të Drejtorisë së Komunikimit të Presidencës së Republikës së Turqisë