Përfaqësues nga Biblioteka “Mehmet Jusufi” në Preshevë kanë zhvilluar një vizitë zyrtare në Bibliotekën Kombëtare të Shqipërisë, në qendrën “Sotir Kolea”, me qëllim forcimin e bashkëpunimit profesional dhe shkëmbimin e përvojave në fushën e bibliotekarisë.
Delegacioni nga Presheva u prit nga znj. Majlinda Toçi dhe stafi i institucionit, të cilët prezantuan funksionimin e strukturave të bibliotekës, organizimin e fondit dokumentar, si dhe projektet aktuale për zhvillimin e shërbimeve bibliotekare në nivel kombëtar. Gjatë takimit u diskutua për mënyrat moderne të menaxhimit të burimeve dhe standardet bashkëkohore në punën bibliotekare.
Vizita përfshiu edhe një tour informues në ambientet e Bibliotekës Kombëtare, ku përfaqësuesit e Bibliotekës “Mehmet Jusufi” u njohën nga afër me procesin e digjitalizimit të materialeve, me laboratorin e restaurimit dhe me programet që synojnë promovimin e leximit te publiku i gjerë.
Nga Biblioteka “Mehmet Jusufi” u vlerësua se ky takim përbën një mundësi të rëndësishme për thellimin e bashkëpunimit institucional dhe identifikimin e fushave të reja të veprimit të përbashkët, me fokus përmirësimin e shërbimeve ndaj lexuesve dhe zhvillimin profesional të stafit.
Në emër të drejtoreshës Albina Azizi, institucioni nga Presheva i shprehu mirënjohje Bibliotekës Kombëtare të Shqipërisë dhe znj. Majlinda Toçi për pritjen dhe gatishmërinë për bashkëpunim, duke theksuar angazhimin për vazhdimin e dialogut dhe projekteve të përbashkëta në të ardhmen.
