Kryetari i APN-së, Visar Memeti, ka reaguar në llogarinë e tij në Facebook në lidhje me rritjen e çmimeve për shërbimet e Ndërmarrjes Publike “Moravica” në Preshevë.
Sipas tij, udhëheqja e Komunës së Preshevës këtë vendim e kanë marrë në kundërshtim me ligjin.
“Sipas nenit 28 të Ligjit për veprimtari komunale, Komuna është e obliguar që kërkesën për ndryshimin e çmimeve ta publikojë së bashku me arsyetimin, në tabelën e shpalljeve si dhe përmes internetit, të paktën 15 ditë para marrjes së vendimit.” shkruan Memeti në Facebook.
Ai mes tjerash akuzon udhëheqjen komunale se diskutimi mbi vendimin për rritjen e çmimeve për shërbimet e Ndërmarrjes Publike “Moravica” në Preshevë është futur në rendin e ditës së mbledhjes së Këshillit Komunal disa ditë pas përfundimit të mbledhjes, pa dijeninë dhe pa miratimin e anëtarëve të Këshillit!