Kur e gjithë bota vijon të jetë e gjunjëzuar nga pandemia dhe kur bëhet thirrje që qytetarë të vaksinohen, OBSH bën me dije se janë duke u testuar tre ilaçe të reja kundër Sars Cov 2.
Testimet klinike janë duke u kryer në 52 vende.
Kreu i OBSH-së bëri me dije se ‘Solidariteti PLUS’ do të testojë tre ilaçe, Artesunate, një trajtim për malarien e rëndë, Imatinib, një ilaç për kancere të caktuara dhe Infliximab, një trajtim për çrregullimet e sistemit imunitar siç është Sëmundja e Crohn.
Në testim, ilaçi Artesunate do të administrohet në mënyrë intravenoze për shtatë ditë, duke përdorur dozën standarde të rekomanduar për trajtimin e malaries së rëndë. Imatinib do të administrohet me gojë, një herë në ditë, për 14 ditë. Infliximab, që përdoret për të trajtuar sëmundjet e sistemit imunitar në testim, do të administrohet intravenoz si një dozë e vetme.
Deri më tani, vetëm kortikosteroidet janë vërtetuar efektivë kundër gjendjes kritike të COVID-19.
Drejtuesit e projektit në OBSH thanë se ilaçet tashmë janë dërguar në më shumë se 10 vende.
Vitin e kaluar testimet zbuluan se të katër ilaçet: Remdesivir, Hidroksilklorinë, Lopinavir/Ritonavir dhe Interferon, kishin pak ose aspak efekt tek pacientet me COVID.