Presidenti Hashim Thaçi, ka thënë se integriteti territorial i Kosovës nuk do të jetë në asnjë mënyrë çështje diskutimi në takimin me Serbinë në Shtëpinë e Bardhë më 27 qershor.
Thaçi ka thënë se versionet se në dialogun Kosovë-Serbi do të diskutohet shkëmbimi i territoreve, janë dezinformata, raporton Gazeta Sinjali.
“Në asnjë anë, nuk pretendohet nga askush, as në Washington të cenojë integritetin territorial të vendin dhe i ftoj të gjithë të mos përhapin dezinformata për shkëmbim territoresh apo diçka”, deklaroi Thaçi para gazetarëve.
“As nuk do të ketë cenim të integritetit territorial, e në asnjë rrethanë, diskutim për integritetin e shtetit të Kosovës”, theksoi Thaçi.
Sipas tij, “Kosova atje shkon si shtet i pavarur dhe sovran me Kushtetutën e vet si vend i pavarur sovran, dhe natyrisht si vend unik, me një politikë shumë shumë të qartë”.
“Prandaj, çdo pretendim dezinformues për të futur konfuzion në opinionin e brendshëm dhe atë ndërkombëtar është i paqëndrueshëm dhe është lajm i rrejshëm”, u shpreh Thaçi