Republika e Shqipërisë ka bërë një hap të rëndësishëm në mbështetje të shqiptarëve në Luginën e Preshevës, duke dhuruar fonde për realizimin e tri projekteve në këtë rajon.
Lajmin e ka bërë të ditur kryetari i Këshillit Kombëtar Shqiptar, përmes një postimi në rrjetet sociale.
Sipas tij, Ambasada e Republikës së Shqipërisë në Beograd ka dhuruar mbështetje financiare për projektet e vitit 2025, të cilat përfshijnë:
- Kursi i gjuhës shqipe për shqiptarët e Sanxhakut
- Festivalin Stand-Up Komedi Fest në Luginë
- Ndertimin e infrastrukturës për përdorimin e gjuhës shqipe në Luginën e Preshevës
Kryetari i KKSH-së falënderoi Ministrinë për Evropën dhe Punët e Jashtme të Shqipërisë dhe Ambasadën shqiptare për angazhimin e tyre, duke vlerësuar hapat e ndërmarra për të mbështetur identitetin kombëtar shqiptar dhe promovuar gjuhën dhe kulturën shqipe në këtë rajon.
Ai theksoi se kjo mbështetje është një hap i rëndësishëm drejt forcimit të lidhjeve mes Shqipërisë, Kosovës dhe Luginës së Preshevës.
Rexhepi theksoi se kjo iniciativë është një përpjekje e përbashkët për të ruajtur dhe kultivuar identitetin kombëtar shqiptar, duke theksuar rëndësinë e vijimësisë së këtij angazhimi.