Kandidati shqiptar për deputet në Kuvendin e Serbisë, Shaip Kamberi, kërkon që zgjedhjet në Luginë të Preshevës përsëriten pasi procesi nuk ishte i lirë e demokratik.
Kamberi edhe pse ka marrë mbi 9600 vota, u shpreh se nuk janë garanci se mund të fitojë mandatin e deputetit.
Për Kamberin, zgjedhjet e fundit në Serbi u karakterizuan me pjesëmarrje të ulët të votuesve shqiptarë dhe kjo sipas tij ndodhi për shkak të pasivizimit të adresave të shqiptarëve.
“Pasivizimi i vendbanimeve të shqiptarëve që rezultoi me shlyerjen e tyre nga listat zgjedhore deligjitimoi procesin zgjedhor, sidomos në Luginën e Preshevës. Shumë shqiptarëve i është pamundësuar e drejta elementare. E drejta për të votuar”, ka shkruar Kamberi në faqen e tij në facebook.
Derisa ende nuk është konfirmuar përfaqësimi i shqiptarëve në parlament, Kamberi përmes reagimit në facebook ka kërkuar përsëritjen e zgjedhjeve parlamentare në tereitorin e Luginës së Preshevës.
“Prandaj zgjedhjet duhen të përsëriten në Luginën e Preshevës, duke zgjidhur paraprakisht çështjen e mohimit të së drejtës për të votuar për çdo qytetar të Luginës së Preshevës.” thuhet në reagimin e Kamberit në facebook.
Ai ka falënderuar të gjithë qytetarët për kulturën e lartë politike që kanë shpërfaqur gjatë këtyre zgjedhjeve.