Kryetari i Organit të përkohshëm në Komunën e Preshevës, njëherit kryetar i PDSH-së, Ragmi Mustafa, ka ftuar seancën konstituive të Kuvendit të Komunës së Preshevës për të shtunën, më datë 20.07.2024.
Mbrëmjen e së ejtes, është nënshkruar marrëveshja për bashkëqeverisje mes PVD-së dhe PDSH-së, por duke mos definuar saktë asgjë nga pozitat e ndara mes subjekteve.
PreshevaPRESS ka raportuar gjatë ditës së djeshme për zhvillimet politike nga momenti në moment, duke raportuar sot edhe për përfshirjen e Aleancës për Luginën në koalicion nga ana e PVD-së.
PVD ka mbajtur sot mbledhje me përbërje të zgjëruar për të njoftuar anëtarësinë dhe organet e saja me detajet e marrëveshje për bashkëqeverisje me PDSH-në.
Në mbledhjen e PVD-së në Preshevë, e cila ka përfunduar, përfaqësuesit e organeve të degës, janë informuar se seanca konstituive e thirrur për nesër do të ndërpritet pas verifikimit të mandateve dhe do të testohet të vazhdojë të dielën për të zgjedhur udhëheqësinë e Kuvendit të Komunës së Preshevës.
Siçka mësuar PreshevaPRESS, përveç mosmarrëveshjeve të paraqitura me integrimin e Aleancës për Luginën nga ana e PVD-së në koalicion, brenda PDSH-së ka pakënaqësi me emrin e kandidatit për kryetar të Kuvendit të Komunës së Preshevës.
Kjo është arsyeja pse seanca konstituive e thirrur për nesër do të ndërpritet dhe planifikohet të vazhdojë të dielën, kur edhe skadon afati ligjor për mos shkuarjen në zgjedhje të jashtëzakonshme lokake në Preshevë.