Kryetari i Këshillit Kombëtar Shqiptar, Enkel Rexhepi, ka zhvilluar takim me Ministrin për Evropë dhe Punë të Jashtme të Republikës së Shqipërisë Igli Hasani, me të cilin temë diskutimi ka qenë jeta e shqiptarëve të Luginës së Preshevës.
Në një postim në rrjetin social Facebook, Rexhepi ka thënë që KKSh-ja, mbetet institucioni kyç për avokimin dhe ngritjen e çështjeve në afirmimin e të drejtave individuale dhe kolektive të shqiptarëve në Luginë.
Në takim sipas Kryetarit janë dakorduar se është mëse e rëndësishme një qasje e vazhdueshme për bashkërendim në mes të institucioneve të Shqipërisë dhe Këshillit Kombëtar Shqiptar për të adresuar të gjitha temat që preokupojnë Luginën e Preshevës.
Rexhepi më tej thotë se ‘’Shqipëria ka një rol të pazëvendësueshëm në mbështetjen e shqiptarëve në Luginë, si në nivel diplomatik, ashtu edhe përmes politikave konkrete që nxisin zhvillimin dhe garantimin e të drejtave themelore’’.
‘’Bashkë me Ministrin e Ministrin për Evropë dhe Punë të Jashtme të Republikës së Shqipërisë, mbetemi të përkushtuar për të qenë një urë bashkëpunimi dhe një zë përfaqësues i interesave të shqiptarëve të Luginës, në bashkërendim të plotë me institucionet e Republikës së Shqipërisë dhe ato të Republikës së Kosovës’’. ka shtuar Rexhepi në njoftim.