Partia për Veprim Demokratik ka mbajtur mbledhjen e parë të kryesisë të posazgjedhur, gjatë së cilës është analizuar gjendja politike e sociale në Luginë.
Kryesia e përgjithshme e Partisë për Veprim Demokratik, në mbledhjen e mbajtur sot, ka shqyrtuar situatën dhe zhvillimet e reja politike rreth shpalljes së zgjedhjeve të jashtëzakonshme parlamentare për 17 dhjetor.
Në kumtesën e lëshuar pas mbledhjes, thuhet se PVD është e vetëdijshme për situatën e rëndë që vjen si pasojë e diskriminimit dhe shtypjes së shqiptarëve në Preshevë, Bujanoc dhe Medvegjë.
Përmes kësaj kumtese, PVD ka shfrytëzuar rastin të e falenderojë Qeverinë e Republikës së Kosovës, për ndarjen e Fondit të veçantë për Luginë të Preshevës.
Sa i përket zgjedhjeve parlametare të shpallura për 17 dhjetor, në kumtesën e PVD-së, nuk përmendet listë e përbashkët me të gjitha partitë shqiptare.
Në vazhdim deklarata e plotë e kryesisë së PVD-së, pas mbledhjes së kryesisë së përgjithshme:
Kumtesë e Kryesisë së përgjithshme të Partisë për Veprim Demokratik
Kryesia e Përgjithshme e Partisë për Veprim Demokratik, në mbledhjen e mbajtur sot, ka shqyrtuar situatën dhe zhvillimet e reja politike rreth shpalljes së zgjedhjeve të jashtëzakonshme parlamentare për 17 dhjetor.
Kryesia e PVD-së me këtë rast, falenderon Qeverinë e Republikës së Kosovës, për ndarjen e Fondit të veçantë për Luginë të Preshevës, duke e konsideruar si veprimin më konkret për të ndihmuar nevojat e shqiptarëve në këtë rajon.
PVD është e vetëdijshme për situatën e rëndë që vjen si pasojë e diskriminimit dhe shtypjes së shqiptarëve në Preshevë, Bujanoc dhe Medvegjë.
Në këto rrethana të rënda politike e ekonomike, kur përsëritja e shpeshtë e zgjedhjeve ka per qëllim dekurajimin e elektoratit të shqiptarëve për pjesmarrje në zgjedhje, PVD konsideron të domosdoshëm unifikimin e faktorit politik shqiptarë si përgjigjen e duhur të mos nënshtrimit dhe mosdorëzimit ndaj represionit shtetëror serb që po thellohet për ditë duke përdorur të gjitha mekanizmat e mundshëm shtetëror.
Kryesia e Partisë për Veprim Demokratik, edhe në këto rrethana, ka vendosur që të marr pjesë në zgjedhjet e 17 dhjetorit dhe ka deleguar kryetarin e partisë si kandidat të PVD-së për deputet, sepse vlerëson se rezistenca aktive politike materializohet duke u dëgjuar zëri i shqiptarëve në çdo instancë të mundshme.
Kryesia e PVD ka diskutuar për rëndësinë e përfaqësimit parlamentar të shqiptarëve të Luginës dhe rëndësinë e bashkërendimit dhe koordinimit me partnerët e sajë politik në Luginë të Preshevës.
Preshevë, 04 nëntor 2023