Kryetari i Kuvendit Komunal të Preshevës, Agim Sabedini, ka zhvilluar sot një takim me Ambasadorin e Republikës së Shqipërisë në Serbi, Bardhyl Canaj.
Në takim ka marrë pjesë edhe drejtori i urbanizmit të komunës, ndërsa bisedimet janë fokusuar në çështje me interes të përbashkët që lidhen me zhvillimin e Preshevës dhe të gjithë Luginës.
“Së bashku me drejtorin e urbanizmit, zhvilluam një takim miqësor e vëllazëror me Ambasadorin e Republikës së Shqipërisë në Serbi, Sh. T. z. Bardhyl Canaj,” ka bërë të ditur Sabedini në një postim në rrjetin social Facebook.
Ai ka shprehur mirënjohjen për angazhimin e ambasadorit në mbështetje të komunitetit shqiptar në Luginë.
“Shpreha mirënjohjen time për angazhimin dhe përkushtimin e vazhdueshëm të Ambasadorit Canaj ndaj rajonit tonë dhe shqiptarëve të Luginës,” ka theksuar Sabedini.
Në fund të takimit, të dyja palët u pajtuan për të vazhduar bashkëpunimin institucional në funksion të zhvillimit dhe forcimit të lidhjeve vëllazërore ndërmjet Preshevës dhe institucioneve të Republikës së Shqipërisë.