Zëvendëskryeministri i parë i Qeverisë së Serbisë dhe ministri i Arsimit, Shkencës dhe Zhvillimit Teknologjik, Branko Ruzhiq ka marrë vendim për ndryshimin e kalendarit të punës arsimore për shkollat fillore dhe të mesme, në bazë të të cilit ditë jo pune për nxënësit do të jetë 17 dhe 18 shkurti.
“Pas konsultimeve të shumta dhe pas shqyrtimit të gjithë situatës dhe parashikimit se kulmi i kësaj vale virusesh pritet në mesin e muajit, mora vendimin për të zgjatur pushimet. Nxënësit do të kenë gjithsej 9 ditë pushim duke bashkuar fundjavat, festat publike dhe dy ditë shtesë. Dita e parë e punës do të jetë e hënë, 21 shkurt”, tha ministri.
Sipas Ruziqit, “shkollat, si më parë, janë të sigurta për shkak të zbatimit dhe respektimit të masave epidemiologjike”.
“Sipas treguesve, rritja e numrit të nxënësve dhe mësimdhënësve të infektuar nuk përcjell rritjen e numrit të të infektuarve në popullatën e përgjithshme”, tha Ruzhiq.
Ai u bëri thirrje nxënësve dhe punonjësve në sistemin arsimor që gjatë pushimeve të ardhshme të jenë të përgjegjshëm ndaj vetes dhe të dashurve të tyre dhe të respektojnë masat e parapara epidemiologjike për të shmangur infeksionet e reja.