Arkitektja nga Presheva, Fatbardha Hajdari Nuredini, e cila jeton në Solothurn të Zvicrës, me fillimin e muajit të Ramazanit, ka marrë iniciativën të grumbullojë pako ushqimore për vendasit e saj në Preshevë.
Aksioni për grumbullimin e të hollave ka për qëllim blerjen e pakove ushqimore për “familjet që janë nën mëshirën e fatit” siç thotë organizatorja e këtij aksioni.
“Pasi që Presheva si komunë është vend më i anashkaluar dhe me papunësinë më të lartë në rajon, dhe derisa është vështirësuar edhe më shumë jeta në këtë kohë për shkak të situatës së krijuar me pandeminë e Covid19, un vendosa që përmes këtij aksioni, të tregojmë solidaritet me bashkëvendësit e mi dhe të zgjasim dorën familjeve që janë nën mëshirën e fatit” ka thënë organizatorja e këtij aksioni, Fatbardha Hajdari Nuredini për PreshevaPRESS.
Fatbardha ka treguar se aksioni realizohet në baza vullnetare dhe grumbullimi i të hollave përfundon të hënën në mbrëmje.
Synojmë të grumbullojmë minimalisht të holla për 100 pako, e që nënkupton se gjatë javës së ardhshme do të shpërndahen pako ushqimore për 100 familjeve në territorin e komunës së Preshevës” shpjegon Fatbardha Hajdari Nuredini për PreshevaPRESS.
Ajo me keqardhje tregon se për shkak të situatës së krijuar si pasojë e masave të ndërmarra kundër pandemisë së Covid19, nuk do të mundet që personalisht të vijë në Preshevë për të realizuar shpërndarjen e pakove ushqimore, por se këtë gjë do ta realizojnë familjarët e saj që gjinden në Preshevë.
Të gjithë të interesuarit për të ndihmuar dhe përkrahur aksionin mundë të e kontaktojnë Fatbardha Nuredinin në facebook dhe instagram, me qëllim që të njoftohen me detajet dhe informacionet për dorëzimin e të hollave.