Kryetari i Këshillit Kombëtar Shqiptar, Ragmi Mustafa zhvilloi takim në Ambasadën Çeke në Beograd, me ç`rast u mirëprit nga ambasadori Tomas Kuchta si dhe e dërguara speciale e Ministrisë së Punëve të Jashtme të Republikës së Çekisë, Janina Hrebickova.
“Gjatë takimit të sotëm u shtjellua situata në Ballkanin Perëndimor, me theks të veçantë për procesin e normalizimit të marrëdhënieve mes Kosovës dhe Serbisë dhe përfshirjen e Luginës së Preshevës në një marrëveshje përfundimtare gjithëpërfshirëse”, thuhet në njoftimin e bërë nga z.Mustafa në Facebook.
“Kryetari Mustafa theksoi se pasur parasysh ngecjen e proceseve që shqiptarëve të Luginës së Preshevës të i sigurohet standardizimi i të drejtave sipas konventave ndërkombëtare, mosrealizimi i premtimeve paraprake që përfaqësuesit politik të shqiptarëve kanë pasur nga Qeveria e Serbisë, çështja e Luginës së Preshevës duhet të bëhet fakt në këtë proces, qoftë edhe pas ndryshimeve në Bruksel” thuhet në komunikatën e KNSH-së në Facebook rreth takimit me diplomatët Çek në Serbi.
Përveç takimit në Ambasadën e Çekisë, gjatë qëndrimit në Beograd, kryetari Mustafa ka realizuar edhe një takim me Ambasadorin e SHBA-ve në Serbi, ambasadorin Kyle Scott.
“Në fokus të bashkëbisedimit: zgjidhja e teksteve mësimore në shkollat shqipe të Luginës dhe pasivizimi i vendbanimeve në Preshevë, Bujanoc dhe Medvegjë”, thuhet në njoftimin e z.Mustafa në profilin e tij privat në Facebook, pasiqë në lidhje me këtë takim nuk pati komunikatë zyrtare nga Këshilli Nacional Shqiptar.