Kryetari i KKSH-së. Nevzad Lutfiu, ka reaguar pas ndalesës që autoritetet serbe ia kanë bërë vizitës së ministrit të Punëve të Brendshme të Kosovës, Xhelal Sveçla në Luginën e Preshevës.
Lutfiu ka thënë se refuzimi i kërkresës së Sfeçlës për të vizituar Luginën nga autoritetet e Serbisë, ka për qëllim që shqiptarët në Luginën e Preshevës të humbin linjat e tyre komunikuese me Kosovën dhe të mos lejohet asnjë lloj bashkëpunimi mes institucioneve komunale por edhe Këshillit Kombëtar Shqiptar me institucionet e Qeverisë së Kosovës.
Në vazhdim ju sjellim postimin e plotë të kryetarit të KKSH-së:
Të nderuar bashkëkombas
Fundin e muajit që shkoi i bëra ftesë ministrit të brendshëm të Kosovës z. Xhelal Sfeçla që të vizitojë Luginën e Preshevës, duke u bazuar në marrëveshjen e Brukselit për vizitat zyrtare. Ftesa kishte për qëllim një vizitë të ministrit Sveçla në Luginë për t’u njohur me gjendjen e shqiptarëve në tri komunat: Preshevë, Bujanoc dhe Medvegjë.
Po ashtu, ishte një ftesë falëmnderuese për njërin nga akterët e Qeverisë së Kosovës e cila po vazhdon të ofrojë mbështetje për shqiptarët e Luginës së Preshevës. Por, siç jemi njoftuar, Serbia e cila udhëhiqet me pushtet totalitar nga Aleksandër Vuçiq, ka refuzuar një vizitë të tillë vëllazërore të ministrit Sveçla në Luginën e Preshevës.
Ky refuzim ka për qëllim që shqiptarët në Luginën e Preshevës të humbin linjat e tyre komunikuese me Kosovën dhe të mos lejohet asnjë lloj bashkëpunimi mes institucioneve komunale por edhe Këshillit Kombëtar Shqiptar me institucionet e Qeverisë së Kosovës. Po ashtu qëllimi i ndalimit të kësaj vizite synon getoizimin e mëtejmë të shqiptarëve të Luginës së Preshevës të cilët janë minoriteti më i diskriminuar në Evropë dhe jo vetëm.
Ne po shpresojmë që kjo të jetë hera e fundit kur Serbia ndalon zyrtarët e lartë të Kosovës për vizita në Luginën e Preshevës dhe ky ndalim të jetë edhe një alarm për Bashkësinë Ndërkombëtare.