Këshilli Kombëtar Shqiptar (KKSH) ka shpallur sot katër thirrje publike për mbështetjen e projekteve që kontribuojnë në zhvillimin dhe forcimin e identitetit kombëtar, kulturor e shoqëror të shqiptarëve në Luginën e Preshevës dhe në Sanxhak.
Këto thirrje janë pjesë e Programit për shpërndarjen e buxhetit të Qeverisë së Republikës së Kosovës, që implementohet nga KKSH me synim përkrahjen e organizatave, mediave dhe nismave lokale që veprojnë në interes të komunitetit shqiptar në Serbi.
Fushat e mbështetjes
Thirrjet publike përfshijnë katër fusha të ndryshme tematikore:
1️⃣ Gjuha shqipe dhe simbolet kombëtare
2️⃣ Arti, kultura dhe trashëgimia kulturore shqiptare
3️⃣ Informimi dhe mediat në gjuhën shqipe
4️⃣ Mbështetje për organizatat dhe shkollat sportive
Vlerësim i pavarur dhe profesional
KKSH ka bërë të ditur se vlerësimi i aplikimeve do të bëhet nga profesionistë të fushave përkatëse, në mënyrë të pavarur dhe transparente, pa asnjë ndikim politik apo institucional.
Sipas njoftimit, në qendër të procesit të përzgjedhjes do të jetë profesionalizmi, puna dhe angazhimi i secilës organizatë shqiptare, pa dallim.
Organizatat, mediat, shkollat sportive dhe nismat kulturore ftohen të aplikojnë sipas udhëzimeve të publikuara në secilën thirrje përkatëse në faqen zyrtare të KKSH-së www.kksh.org