Në Gjermani, një numër i madh biznesesh kanë kundërshtuar masat kufizuese të vendosura për shkak të rritjes së shifrave të koronavirusit.
Ankesat e tyre kane gjetur edhe përkrahjen e drejtësisë. Kështu një gjykatë në Berlin ka pezulluar vendimin për shtetrrethimin.
Autoritetet në Berlin një javë më parë vendosën mbylljen e bareve dhe restoranteve nga ora 23:00 deri në orën gjashtë të mëngjesit.
“Shtetrrethimi është pezulluar për momentin pasi gjykata e konsideron atë jo proporcional në funksion të masave të tjera të marra për të luftuar pandeminë”,- tha një zëdhënës i Gjykatës Administrative në Berlin.
Gjykata tha se nuk kishte asnjë provë se baret dhe restorantet që u përmbaheshin rregullave ekzistuese mbi mbajtjen e maskave dhe distancës, kontribuonin apo jo në shifrat e të prekurve me COVID 19.
Ishin 11 pronarë restorantesh të cilët kundërshtuan vendimin e qeverisë për mbyllje. Shumë prej tyre shprehen se kjo masë do të ishte katastrofike pas edhe pezullimit të pranverës.
“Është një farsë për të qenë i sinqertë, verdikti është një farsë. Shtetrrethimi është hequr, por nga 23:00 nuk na lejohet të shesim alkool. Ne do t’i përmbahemi rregullave, por në disa pjesë të Berlinit ka bare që nuk u interesojnë. Ata nuk do të ndjekin rregullat, të cilat unë mund t’i kuptoj. Kjo ka të bëjë me mbijetesën”, u shpreh Philipp Bubinger, një pronar restoranti.
Nga ana tjetër Ministri i Shëndetësisë Jens Spahn mbrojti masat, duke thënë që frenimi i përhapjes së infeksioneve përmes jetës së natës në qytetet e mëdha ishte jetik për të shmangur mbylljen totale te shkollave dhe bizneseve te tjera. /Euronews.al