Kongresmeni amerikan Keith Self ka prezantuar në Kongresin e Shteteve të Bashkuara të Amerikës një nismë ligjore që i kushtohet drejtpërdrejt gjendjes së shqiptarëve në Luginën e Preshevës.
Bëhet fjalë për Aktin për vlerësimin e diskriminimit në Luginën e Preshevës, i cili synon të trajtojë mënyrën se si autoritetet serbe i qasen të drejtave të shqiptarëve në Preshevë, Bujanoc dhe Medvegjë.
Lajmi është bërë i ditur nga faqja Albanians For America, e cila ka theksuar se ky akt obligon Departamentin Amerikan të Shtetit të realizojë një vlerësim zyrtar mbi diskriminimin institucional dhe sistematik ndaj shqiptarëve etnikë në Luginë të Preshevës. Raporti që pritet të përgatitet do të shërbejë si bazë për orientimin e politikës së jashtme amerikane dhe për veprime të mundshme diplomatike në lidhje me respektimin e të drejtave të njeriut dhe të pakicave kombëtare.
Gjatë procedurës zyrtare në Kongresin amerikan, anëtarë të Komitetit të Punëve të Jashtme të Dhomës së Përfaqësuesve kanë ngritur shqetësimet e vazhdueshme për shkeljet e të drejtave të njeriut dhe të pakicave në Luginë të Preshevës – çështje që, sipas tyre, shpesh kanë mbetur jashtë vëmendjes së qëndrueshme ndërkombëtare.
Nisma e kampionuar nga kongresmeni Keith Self parasheh një vlerësim gjithëpërfshirës të formave të diskriminimit me të cilat përballen shqiptarët e Luginës së Preshevës, përfshirë përjashtimin politik, kufizimet në përdorimin e gjuhës shqipe, pengesat në arsim, margjinalizimin ekonomik dhe praktikat e frikësimit institucional.
Sipas Albanians For America, organizata ka punuar ngushtë me zyrat e Kongresit për t’i çuar këto shqetësime përpara dhe për t’i bërë ato pjesë të diskutimit zyrtar në nivelet më të larta të politikëbërjes amerikane. Në këtë kuadër, është shprehur mirënjohje edhe për kryetarin e Komitetit të Punëve të Jashtme, Brian Mast, si dhe për anëtarin e renditjes, Gregory Meeks, për angazhimin e tyre në mbrojtjen e vlerave demokratike dhe të drejtave të njeriut në Ballkanin Perëndimor.
Sipas vlerësimeve të organizatorëve, ky zhvillim përfaqëson një moment domethënës për shqiptarët e Luginës së Preshevës dhe dëshmon se avokimi i vazhdueshëm, kur shoqërohet me angazhim institucional, mund të kthehet në veprim konkret me ndikim ndërkombëtar.