Skuadra e madhe nga Turqia, Galatasaray ka konfirmuar organizimin e kampit të futbollit të Kosovë, falë bashkëpunimit me Shkollën e Futbollit “Besëlidhja” nga Prishtina.
Drejtuesit e SHF “Besëlidhja” kanë bërë të ditur se kanë arritur që gjigantin turk ta sjellin në Kosovë për të mbajtur një kamp që do të jetë një përvojë e jashtëzakonshme për të gjithë pjesëmarrësit.
Në bashkëpunim të drejtpërdrejtë me Galatasarayn, kampi do të mbahet nga data 1 deri më 5 korrik në Kampin Nacional të FFK-së, në Hajvali.
Në këtë kamp, do të jenë të pranishëm trajnerët dhe stafi zyrtar i klubit nga Turqia, të cilët do të vëzhgojnë në afër talentet e rinj, që në një të ardhme të afërt mund të shndërrohen në yje të futbollit evropian.
Ky do të jetë një rast i veçantë për të gjithë futbollistët e rinj që ëndërrojnë të depërtojnë në botën e futbollit profesionist pasi do ta kenë mundësinë të tregojnë dhe dëshmojnë veten para një emri të madh si Galatasaray.
SHF “Besëlidhja” ka bërë të ditur se sa i përket informative shtesë në lidhje me pjesëmarrjen në këtë kamp, do të lajmërojnë së shpejti.
Ardhja e klubit me nam nga Turqia në Kosovë nëpërmjet SHF “Besëlidhja” ishte paralajmëruar të dielën mbrëma në emisionin sportiv “VAR” të Tëvë 1.