Kryetarja e Preshevës, Ardita Sinani ka reaguar sot përmes një postimi në Facebook lidhur me situatën e krijuar nga reshjet e dendura të orëve të fundit në Preshevë, të cilat kanë shkaktuar vërshime dhe vështirësi për qytetarët në disa zona të qytetit.
Ajo ka theksuar se përmbytjet e fundit kanë nxjerrë në pah, sipas saj, pasojat e investimeve të realizuara nga qeverisja e mëparshme në nivel lokal, duke i cilësuar ato si projekte pa planifikim të mirëfilltë dhe pa zgjidhje afatgjata. Sinani ka vlerësuar se mungesa e një sistemi të qëndrueshëm për kanalizimin atmosferik po reflektohet sa herë ka reshje intensive.
“Në terren me ekipin tim për të inspektuar pikat kritike ku vërshimet po vështirësojnë jetën e qytetarëve tanë”, ka shkruar ajo, duke bërë të ditur se institucionet komunale janë të angazhuara drejtpërdrejt në menaxhimin e situatës.
Si një nga rastet konkrete, ajo ka përmendur Rrugën e Karposhit, për të cilën ka deklaruar se miliona euro të investuara nga pushteti i kaluar sot gjenden nën ujë. Sipas saj, projekti i prezantuar dikur si sukses ka rezultuar pa zgjidhje të qëndrueshme për kanalizimin e ujërave atmosferike, duke e cilësuar këtë si një mangësi serioze në planifikim dhe zbatim.
Kryetarja ka ngritur gjithashtu shqetësimin për, siç e ka quajtur ajo, papërgjegjësinë qytetare. Sipas saj, një pjesë e bllokimeve në kanalizime dhe përrenj po shkaktohet nga hedhja e mbeturinave, çka po ndikon drejtpërdrejt në përkeqësimin e situatës gjatë reshjeve.
Në reagimin e saj bëhet e ditur se ekipet e Ndërmarrjes “Moravica” dhe Njësisë së Zjarrfikësve janë të angazhuara maksimalisht në terren, duke punuar për pastrimin e kanaleve të bllokuara, sanimin e dëmeve të menjëhershme dhe eliminimin e çdo rreziku për banorët.
Në fund, Sinani ka theksuar se mbetet e përkushtuar për zgjidhje të qëndrueshme dhe afatgjata, duke shtuar se institucioni që ajo udhëheq është në shërbim të plotë të qytetarëve në çdo situatë dhe në çdo kohë.