Komuna e Preshevës ka vendosur që të anuloj konkursin për bashkëfinancim të projekteve të medieve lokale, derisa në kundërshtim me ligjin organizatës joqeveritare “info SUN 2020”, organizatë që ka në pronësi portalin e drejtorit të shtëpisë së shëndetit në Preshevë, në prag të Vitit të Ri të i dhurojë dhuratë prej 1.000.000,00 din., deri tash të konfirmuara dhe dokumentuara nga PreshevaPRESS.
Komuna e Preshevës për të përkrahur punën e medieve në Preshevë, më 21.10.2019 ka hapur Konkurs për projektet e bashkëfinancimit në realizimin e interesit publik në fushën e informimit publik në territorin e komunës së Preshevës, për vitin 2019, duke i vënë në dispozicion 1,000,000.00 din., për të gjitha mediet të regjistruara në Komunën e Preshevës.
Edhe pse me vendimin mbi buxhetin e Komunës së Preshevës për vitin 2019 të datës 18.12.2019 ishin paraparë 8,000,000.00 din., për realizimin dhe përmirësimin e interesit të përgjithshëm në lëminë e informimit publik, kjo vlerë në çdo rishikim të Buxhetit për vitin 2019 përgjysmohej duke arritur që në rishikimin e fundit të buxhetit të Komunës së Preshevës për vitin 2019-të, të avullohen të gjitha 8,000,000.00 din., të parapara për të përkrahur punën e mediave lokale.
Rishikimi i parë i Buxhetit të Komunës së Preshevës për vitin 2019
Deri më 25.02.2019, ditën kur është diskutuar dhe votuar Vendimi mbi rishikimin e parë të buxhetit të Komunës së Preshevës për vitin 2019, mjetet e parapara për bashkëfinancim të projekteve për realizimin e interesit publik në fushën e informimit në territorin e komunës së Preshevës, në buxhetin e Komunës së Preshevës kanë qenë në dispozicion shuma e paraparë me Vendimin e buxhetit për vitin 2019 me lartësi prej 8,000,000.0 din.
Përmes këtij rishikimi të buxhetit vërehet se nga data 01.01.2019 e deri me datë 25.02.2019 nuk është harxhuar ose realizuar asnjë qindarkë për informimin publik.
Vendimit të rishikimit të buxhetit për vitin 2019 në muajin shkurt
Rishikimi i dytë i Buxhetit të Komunës së Preshevës për vitin 2019
Në muajin korrik, respektivisht më 16.07.2019, në seancën e Kuvendit Komunal të Preshevës sipas të dhënave të paraqitura në Vendimin mbi rishikimin e buxhetit të Komunës së Preshevës për vitin 2019 del se nga data 25.02.2019 e deri më 31.05.2019 nga mjetet e parapara të Komunës së Preshevës për të bashkëfinancuar projektet për realizimin e interesit në fushën e informimit publik në territorin e komunës së Preshevës, janë realizuar 3,000,000.00 din.
Nëse marrim krahasojmë të dhënat që janë dhënë në rishikimin e buxhetit të Komunës së Preshevës në muajin shkurt, dhe të dhënat në rishikimin e buxhetit në muajin korrik, nënkuptohet se brenda periudhës pesë mujore mes muajit mars dhe korrik nga mjetet e parapara për përkrahjen e medieve të regjistruara në territorin e komunës së Preshevës janë realizuar 3,000,000.00 din., edhe pse nuk ka pasur asnjë konkurs për shpërndarjen e tyre sipas kërkimit në faqen e komunës së Preshevës.
Vendimit mbi rishikimin e buxhetit për vitin 2019 në muajin korrik
Pra, nga muaji mars deri në muajin korrik sipas të dhënave të paraqitura në Vendimin mbi rishikimin e dytë të buxhetit të Komunës së Preshevës për vitin 2019, shihet se janë realizuar 3,000,000.00 din., nga mjetet e parapara për të bashkëfinancuar projektet për realizimin e interesit në fushën e informimit publik në territorin e komunës së Preshevës.
Edhe pse gjatë kësaj kohe nuk ka pasur asnjë thirrje publike për bashkëfinancim apo përkrahje të projekteve me interes publik në fushën e informimit publik, Komuna e Preshevës ka paraqitur si të realizuara 3,000,000.00 dinar nga gjithsej 8,000,000.00 të parapara me Vendimin mbi buxhetin e vitit 2019.
Rishikimi i tretë i Buxhetit të Komunës së Preshevës për vitin 2019
Tabela e paraqitur në Vendimin mbi rishikimin e buxhetit të Komunës së Preshevës për vitin 2019 për herë të tretë, është krejtësisht e paqartë pasi që paraqiten sipas kësaj tabele, mjete të parapara për të përkrahur informimin publik për vitin 2019 paraqiten 5,000,000.00 e jo 8,000,000.00 sikur në rishikimet e mëparshme.
Vendimit mbi rishikimin e buxhetit për vitin 2019 në muajin tetor
Më pas në pjesën e mjeteve të realizuar paraqiten 3,000,000.00 din. mjete të realizuara mes muajit mars dhe qershor, të cilat janë paraqitur edhe në rishikimin e dytë të buxhetit, periudhë gjatë së cilës nuk ka pasur thirrje publike për shpenzimin e këtyre mjeteve por që janë avulluar pa ndonjë arsyetim.
Derisa në periudhën për tre muajit e fundit (tetor, nëntor, dhjetor) parashihen të realizohen edhe 4,000,000.00 dinar nga buxheti i Komunës së Preshevës për interesin publik në informim, pra për përkrahjen e programeve dhe projekteve të medieve të regjistruara në territorin e Preshevës.
Rishikimi i katërt i Buxhetit të Komunës së Preshevës për vitin 2019
Në seancën e Kuvendit Komunal të Preshevës të mbajtur më 06.12.2019 kur u votua edhe Vendimi mbi buxhetin e Komunës së Preshevës për vitin 2020, u miratua edhe një rishikim i buxhetit të Komunës së Preshevës për vitin 2019.
Në materialet e dërguara për këshilltarët e Kuvendit Komunal të Preshevës në pjesën ku paraqiteshin të dhënat e mjeteve për realizimin e interesit në informimin publik u shkaktua edhe një konfuzion duke paraqitur të dhëna që nuk përputheshin mes vete.
Në pjesën e mjeteve të parapara për realizimin e interesit për informimin publik përmes kontratave për vitin 2019 u paraqitën 4,000,000.00 din., që dallonte me të dhënat e paraqitura në pasqyrën e Vendimit mbi rishikimin e buxhetit të Komunës së Preshevës në muajin tetor që ishte 5,000,000.00 din., e nuk kishte ngjashmëri as me rishikimin e buxhetit në muajin korrik ku paraqiteshin 8,000,000.00 din.
Edhe më tutje në pjesën e realizimit të mjeteve deri në vitin 31.10.2019 u paraqitën 3,000,000.00 din sikurse edhe në dy rishikimet e më hershme të buxhetit duke dëshmuar se nga mjetet e parapara për informimin publik janë avulluar 3,000,000.00 gjatë tremujorit të dytë, mes muajit mars dhe maj edhe pse nuk ka pasur asnjë konkurs publik.
Derisa nga data 06.12.2019 e deri në fund të vitit sipas rishikimit të muajit dhjetor parashiheshin edhe 4,000,000.00 din., për tu shpenzuar në realizmin e interesit publik të informimit përmes shpërndarjes së mjeteve me kontrata.
Vendimit mbi rishikimin e buxhetit për vitin 2019 në muajin dhjetor
Mirë po gjatë seancës së fundit të Kuvendit Komunal të Preshevës, kryetari Arifi e paralajmëroi anulimin e Konkursit të hapur më 21.10.2019, veprim ky që u formalizua më 12.12.2019 përmes Vendimit të Këshillit Komunal.
Kështu që deri më tani, Komuna e Preshevës nga parashikimi 8,000,000.00 për përkrahjen e mediave të regjistruara në territorin e komunës së Preshevës, ka shpërndarë vetëm 1,000,000.00 din. përmes ndërmarrjeve publike siç është Shtëpia e Kulturës “Abdulla Krashnica” dhe Qendra Sportive “Presheva” duke ia dedikuar portalit të drejtorit të shtëpisë së shëndetit dhe duke u avulluar rreth 7,000,000.00 din. të tjera të parapara me Vendimin mbi buxhetin të Komunës së Preshevës për vitin 2019 të datës 20.12.2018.