Diskriminim dhe shkelje e madhe po u bëhet shqiptarëve që jetojnë në tri komunat shqiptare në Serbi, Preshevë, Medvegjë dhe Bujanoc. Kështu është vlerësuar sot në mbledhjen e Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi.
Tema kryesore e kësaj mbledhje padyshim se ishte diskutimi rreth kërkesave të Këshillit Kombëtar Shqiptar nga vizita e përbashkët e realizuar në Luginë të Preshevës.
Kryetari i këtij komisioni, Nait Hasani përmendi një varg ngecjesh të statusit të shqiptarëve atje.
“Ka ra numri i nxënësve, numri i popullsisë për shkak të presionit të Serbisë për tu shpërngulur shqiptarët nga Lugina. Kërkesat e shqiptarëve kanë qenë që të bashkohen me Kosovën dhe ata ndjehen të tradhtuar nga institucionet e Kosovës për shkak të mos mbështetjes”, ka deklaruar ai.
Sipas tij, gjendja e shqiptarëve është më e keqe se sa që ishte para 4 vitesh.
“Shqiptarët atje po diskrimohen në arsim, shëndetësi. Po u bëhet presion për me lëshu vendin nga Serbia”, ka deklaruar ai.
Nga ana tjetër, deputeti i LVV-së, Smajl Kurteshi theksoi se pas takimit që zhvilluan me Këshillin Kombëtarë të Shqiptarëve, u konfirmoi se gjendja është shumë e rëndë.
“Në institucionet arsimore ka diskrimin në kuadrot profesionale pasi që nuk po u pranohen diplomat e Univesireteteve të Kosovës dhe s’po mundon të japin mësim nëpër shkolla”, ka deklaruar ai.
Më tej, Kurteshi përmendi edhe rastin e Spitalit të Vranjës, ku po bëhet shkelje e madhe ndaj shqiptarëve.
“Në spitalin e Vranjës ka 600 të punësuar, 40% e pacientëve janë shqiptarë, ndëresa aty punon vetëm një shqiptar. Në Komunën e Medvegjë, 80 punëtorë serbë dhe 3 shqiptarë”, ka deklaruar ai.
Ndryshe, anëtarët e Komisionit, përmendën edhe faktin se si në Kadastrën të Luginës nuk punon asnjë shqiptarë sepse aty, sipas tyre, po tentohet të bëhet edhe “de jure” shpërngulja e ligjshme duke u larguar nga regjistrat.