Raportet ndërmjet UÇK-së e LDK-së janë rikthyer në diskutimet publike, sidomos pas nisjes së gjykimit në Dhomat e Specializuara të Hagës ndaj krerëve të UÇK-së.
Zyra e Prokurorit të Specializuar po akuzon Thaçin e të tjerët se kanë përdorur dhunë ndaj zyrtarëve të LDK-së, si rivalë politikë.
Megjithatë, janë disa deklarata të ish-presidentit të Kosvoës, Ibrahim Rugova, i cili fliste për vrasjet e zyrtarëve të LDK-së.
Ai në një konferencë për media, më 8 maj 1998, kishte deklaruar se vrasjet e veprimtarëve të LDK-së janë akte të qëllimshme të Beogradit.
“Rugova e konsideroi dhunën dhe vrasjen e veprimtarëve politikë dhe humanitar shqiptarë, veçanërisht atyre të LDK-së, si akte të qëllimshme të Beogradit me qëllim të eliminimit të lëvizjes politike në Kosovë. Ai kërkoi dërgimin urgjent të ndihmave humanitare ndërkombëtare në rajonet e izoluara, në të cilat, siç tha Rugova, forcat serbe nuk kanë lejuar që ndihma me artikuj ushqimorë dhe medikamente të kalojë për banorët vendas“, thuhet në një raportim ATA-s.
Më 31 tetor 1998, presidenti Ibrahim Rugova e kishte mbajtur një takim me gazetarët. Për këtë takim, kishte raportuar edhe gazeta “Bujku”.
“Nuk ka përçarje mes popullit tonë. Grupet e armatosura të UÇK-së dhe patriotët lokalë janë njerëz që kanë dashur të reagojnë kundër represionit dhe okupimit dhjetëvjeçar. Serbia ka imponuar një zgjidhje ushtarake“, kishte deklaruar presidenti Rugova.