Partia për Veprim Demokratik ka reaguar sot në lidhje me emërtimin e Organit të përkohshëm nga Qeveria e Serbisë për Komunën e Preshevës.
PVD përmes një postimi në faqen e saj në rrjetin social facebook, ka akuzuar Beogradin në lidhje me emërimin e Organit të Përkohshëm, duke shkruar se bashkëpunimi mes Vuçiq dhe Daçiq po rezulton me mbajtjen e Shqiprim Arifit në pushtetin lokal në Preshevë.
“Partia për Veprim Demokratik e konsideron skandaloz vendimin e Qeverisë së Republikës së Serbisë (SNS-SPS) për t’ia mundësuar shumicën vendimmarrëse Shqiprim Arifit në Organin e Përkohshëm.” thuhet në komunikatën e Shërbimit për Informim të PVD-së, të publikuar në rrjetin social facebook.
Kjo parti më tutje ka vazhduar të akuzojë presidentin Vuçiq dhe kryetarin e Parlamentit të Serbisë Daçiq se përmes vendimit për emërimin e Organit të përkohshëm për Komunën e Preshevës, kanë përmbytur rezultatin e vullnetit popullor në Preshevë siç e kanë definuar “me një vendim nga zyrja e Beogradit”.
“Ky vendim i pushtetit në Beograd për ta favorizuar Shqiprim Arifin e shndërron Organin e Përkohshëm në Organ të Dhunshëm, sikurse në kohën e Millosheviqit, kur Beogradi i vendoste qeveritarët e pakicës politike për udhëheqës të Preshevës.” vazhdon akuza e PVD-së në drejtim të Vuçiq dhe Daçiq.
Edhe pse vendimi për emërimin e Organit të përkohshëm për Komunën e Preshevës është marrë nga Qeveria e Republikës së Serbisë, në krye të së cilës është Ana Bërnabiq, në komunikatën e PVD-së, asnjëherë nuk përmendet emri i kryeministres së Serbisë.
Kujtojmë që Organi i përkohshëm për Komunën e Preshevës është emëruar nga Qeveria e Republikës së Serbisë më 12 dhjetorë 2020, vendim ky përmes të cilit është vendosur që kryetar i tij të jetë Shqiprim Arifi, derisa si anëtarë në këtë organ janë: Ragmi Mustafa nga PDSH, Branko Trajkoviq nga partia e Vuçiq, Amir Latifi nga APN, dhe Ardita Sinani nga PVD. Jashtë Organit të përkohshëm është lënë Lëvizja për Reforma e Sami Salihut, parti e cila deri në seancën e fundit të Kuvendit Komunal të Preshevës ka qenë pjesë e koalicionit qeverisës APN-LR-SNS.
Në vazhdim mundeni të e lexoni komunikatën e plotë të PVD-së të publikuar në faqen e kësaj partie në facebook:
Pushteti Vuçiq-Daçiq po e mbanë Shqiprim Arifin në pushtet edhe pse është pakicë politike, por nuk do të mund ta ndalojë vullnetin e shumicës së qytetarëve të Preshevës.
Partia për Veprim Demokratik e konsideron skandaloz vendimin e Qeverisë së Republikës së Serbisë (SNS-SPS) për t’ia mundësuar shumicën vendimmarrëse Shqiprim Arifit në Organin e Përkohshëm.
Jo vetëm që pushteti Vuçiq-Daçiq në Beograd ka vendosur që shumicën e Organit të Përkohshëm ta përbëjë vetëm një pjesë e ish-partnerëve të koalicionit qeverisës komunal, duke e përjashtuar krejtësisht LR e Sami Salihut; por edhe nuk e ka respektuar as kriterin e shumicës parlamentare.
Pushteti Vuçiq-Daçiq ka vendosur që 17 këshilltarë komunalë (15 nga APN dhe 2 nga SNS-PUPS-SPS) të përfaqësohen me 3 anëtarë në Organin e Përkohshëm: Shqiprim Arifi – Amir Latifi (APN) dhe Branko Trajkoviqi (SNS-PUPS-SPS); teksa 21 këshilltarë komunalë (PDSH-11, PVD-6, LR -3 dhe BDL-1) të përfaqësohen me 2 anëtarë: Ardita Sinani (PVD) dhe Ragmi Mustafa (PDSH).
Pra, pushteti Vuçiq-Daçiq përmbyti rezultatin e vullnetit popullor në Preshevë me një vendim nga zyrja e Beogradit. Si Stalini, që thoshte se nuk është më rëndësi kush voton, por kush numëron!
Ky vendim i pushtetit në Beograd për ta favorizuar Shqiprim Arifin e shndërron Organin e Përkohshëm në Organ të Dhunshëm, sikurse në kohën e Millosheviqit, kur Beogradi i vendoste qeveritarët e pakicës politike për udhëheqës të Preshevës.
Por, ky vendim nuk është ndonjë befasi. Nuk është se pushteti Vuçiq-Daçiq nuk e di se 17 është më pak se 21. Por thjesht, ata e duan Shqiprim Arifin për vendimmarës në emër të Preshevës. Këtë e di tashmë secili njeri i vetedijshëm politikisht. Madje e pranojnë privatisht dhe ata pak simpatizantët e mbetur të Shqiprim Arifit.
Kjo u dëshmua edhe me rastin e vendimit për Organin e Përkohshëm më vitin 2017, apo edhe gjatë tërë këtij mandati të fundit, ku ishin dy votat përcaktuese të këshilltarëve të SNS-PUPS-SPS të Vuçiqit dhe Daçiqit, që ia mundësonin kryeatarllëkun Shqiprim Arifit.
Por, sado që pushteti Vuçiq-Daçiq në Beograd dëshmon se e do vetëm Shqiprim Arifin dhe SNS-PUPS-SPS në qeverisjen e Preshevës, përfaqësuesja e Partisë për Veprim Demokratik nuk do t’i bindet këtij vullneti, duke mbikëqyrur çdo vendim të Organit të Dhunshëm.
Pushteti Vuçiq-Daçiq edhe mund të vazhdojë ta përdor pushtetin dhe mekanizmat e tij, për ta shpëtuar Shqiprim Arifin. Por nuk do të mundet të shpëtojë nga vota e qytetarëve. Po afrohet dita kur do ta kthejmë demokracinë duke e dërguar pakicën politike në opozitë.
Dita kur do t’i japim bashkërisht fund qeverisjes skandaloze të Shqiprim Arifit, e cila e përkeqësoi edhe më shumë keqeverisjen 12 vjeçare të Ragmi Mustafës.
Shërbimi për Informim i Partisë për Veprim Demokratik