Ambasada e Republikës së Shqipërisë duket se është shqetësuar me problematikat e krijuara së fundmi në Luginë, me listën e përbashkët shqiptare për zgjedhjet parlamentare në Serbi.
Një delegacion i Ambasadës së Shqipërisë në Beograd, i udhëhequr nga Ambasadori i Republikës së Shqipërisë në Serbi, Ilir Boçka, po qëndron në Preshevë, me ç`rast do të takojnë të gjithë liderët e partive politike shqiptarë në Luginë, sonte rreth orës 21:00, në sallën për konferenca në objektin e Komunës së Preshevës.
Ky takim siç duket vjen si pasojë e paraqitjes së problematikave të reja brenda APN-së për kandidatin kryesorë të kësaj partie në listën e përbashkët shqiptare, e që po shihet si tentativa e APN-së për ta denigruar procesin e iniciuar nga Ministri për Evropën dhe Punët e Jashtme të Republikës së Shqipërisë.
Rikujtojmë se lista e përbashkët shqiptare u krijua me sponsorizim dhe investim të Ministrit për Evropën dhe Punët e Jashtme të Republikës së Shqipërisë, Gent Cakaj, dhe mori përkrahjen e shumë përfaqësuesve institucional nga Kosova dhe Shqipëria.
PreshevaPRESS do të ju informojë në vijim me rrjedhën e vizitës së këtij delegacioni dhe takimet në kuadër të sajë, por deri më tani nuk është paralajmëruar ndonjë adresim për media nga ana e përfaqësuesve lokal apo atyre të Ambasadës.