Siç ka raportuar para dy ditëve PreshevaPRESS, udhëheqësit politik nga Lugina kanë udhëtuar për Tiranë gjatë ditës së djeshme për të u takuar me ministrin për Evropën dhe Punët e Jashtme të Republikës së Shqipërisë, Gent Cakaj në një darkë pune.
Ministri për Evropën dhe Punët e Jashtme të Republikës së Shqipërisë Cakaj, takimin e përbashkët me liderët e partive politike shqiptarë në Luginë e ka ftuar për të tentuar edhe një herë krijimin e një liste të vetme shqiptare në zgjedhjet parlamentare të Serbisë që planifikohen të mbahen në pranverën e vitit 2020. Agjenda ka filluar dje me një darkë pune e cila ka zgjatur më shumë se 3 orë dhe ka vazhduar sot në Ministrinë për Evropën dhe Punët e Jashtme.
Ministri Cakaj përmes një postimi në facebook rreth takimit me përfaqësuesit politik të Luginës nuk ka përmendur askund çështjen e zgjedhjeve parlamentare në Serbi që pritet të mbahen gjatë pranverës së ardhshme, duke lënë të kuptohet se ka dështuar të sigurojë garancinë për unifikimin e faktorit politik në Luginë rreth listës së përbashkët pjesëmarrëse në zgjedhjet parlamentare në Serbi.
“Bashkëkombësit tanë në Serbi nuk janë vetëm një faktor margjinal por një aset shumë i vyer shoqëror e kombëtar. Ne do të vazhdojmë të artikulojmë shqetësimet e përbashkëta dhe të punojmë pakursyer në shërbim të mbrojtjes së të drejtave të tyre !” thuhet mes tjerash në postimin e ministrit Cakaj në faqen e tij në facebook.
Cakaj në postimin e tij ka deklaruar se është biseduar rreth problemet me të cilat ballafaqohen shqiptarët që jetojnë në Luginë të Preshevës duke përmendur pasivizimin e vendbanimeve në Luginë të Preshevës, njohja e teksteve mësimore në shkolla fillore e të mesme e përdorimi i papenguar i simboleve kombëtare si dhe përfshirja proporcionale në të gjitha nivelet e institucioneve shtetërore.
Vlen të ceket se para zhvillimit të takimit të thirrur nga ministri Cakaj me përfaqësuesit politik të Luginës, nënkryetari i Partisë Demokratike Shqiptare Ilir Sadriu është i vetmi që ka komentuar në lidhje me zgjedhjet parlamentare që priten të mbahen vitin e ardhshëm duke thënë se qëndrimi i PDSH-së është i qartë dhe i kamotshëm për mospjesëmarrje në këto zgjedhje, qëndrim ky që sipas informacioneve që ka siguruar PreshevaPRESS është mbrojtur fuqishëm edhe në takimin e përfaqësuesve politik të Luginës me ministrin Cakaj nga kryetari i PDSH-së Ragmi Mustafa.
Në takim siç ka raportuar PreshevaPRESS përveç kryetarëve të partive politike shqiptare në Luginë, te ftuar kanë qenë edhe deputeti i vetëm shqiptar në Serbi z.Fatmir Hasani, kryetari i Këshillit Nacional Shqiptar Ragmi Mustafa dhe përfaqësuesi i APN-së në Medvegjë, Muharrem Salihu derisa në darkën e mbrëmshme prezent ka qenë edhe Ambasadori i Kosovës në Shqipëri, Nait Hasani.