Aleanca për Luginën: I domosdoshëm unifikimi i faktorit politik shqiptarë në Luginë

Derisa po afrohen zgjedhjet parlamentare në Serbi, të shpallura për 17 dhjetor 2023, poashtu janë intensifikuar takimet dhe deklaratat e udhëheqësve politik të shqiptarëve të Luginës. 


Gjatë ditës së djeshme Kryeministri i Republikës së Kosovës, Albin Kurti, ka organizuar një takim me udhëheqësit e partive politike shqiptare në Luginë, në lidhje me çështjen e zgjedhjeve parlamentare dhe unifikimit të tyre në një listë.

Pjesë e takimit ka qenë edhe përfaqësuesi i grupimit më të ri politik, i cili është në fazën e themelimit, Aleancës për Luginën, Armend Aliu.

Këshilli inicues i Aleancës për Luginën, një ditë pas takimit me Kryeministrin Kurti, ka dalë me një deklaratë, përmes të cilës kërkon unifikimin e të gjithë faktorit politik shqiptar në Luginë, në një listë të vetme.

“Aleanca për Luginën vlerëson se gjendja e përgjithëshme shoqërore dhe ekonomike e shqiptarëve të Luginës së Preshevës është në pozitë jashtëzakonisht të vështirë, si rezultat i politikës së Qeverisë serbe, prandaj unifikimin e faktorit politik shqiptarë e sheh të domosdoshëm.” thuhet mes tjerash në këtë postim.

Në vazhdim ju sjellim postimin e plotë:

Aleanca për Luginën e vlerëson lartë angazhimin dhe përkushtimin e Kryeministrit të Republikës së Kosovës, z. Albin Kurti, për unifikimin e faktorit politik shqiptarë në Luginë të Preshevës, me rastin e zgjedhjeve të parakohshme parlamentare në Serbi, të cilat do të organizohen më datë 17.12.2023.

Aleanca për Luginën konsideron se spektri politik në Luginë të Preshevës duhet të ndërtoj platformë të përbashkët politike, përmes së cilës do të arrihet kohezion me qëllim të realizimit të të drejtave individuale dhe kolektive të shqiptarëve në Luginë të Preshevës.

Këtë e konfirmon më së miri edhe takimi i së martës, më 07.11.2023 në Zyren e Kryeministrit të Republikës së Kosovës. Në këtë takim, i cili ishte i ftuar nga vetë Kryeministri, e në të cilin morrën pjesë përfaqësuesit e partive dhe lëvizjeve politike nga Lugina e Preshevës: Shaip Kamberi nga Partia për Veprim Demokratik, Shqipërim Musliu nga Lëvizja e Progresit Demokratik, Ragmi Mustafa nga Partia Demokratike Shqiptare, Naser Aziri nga Unioni Demokratik Shqiptar dhe Armend Aliu nga Aleanca për Luginën, u dakorduan që, duke pasur parasysh rrethanat e rënda politike në Luginë të Preshevës, të unifikohen në një listë të përbashkët për pjesëmarrje në zgjedhjet e parakohshme parlamentare.

Aleanca për Luginën vlerëson se gjendja e përgjithëshme shoqërore dhe ekonomike e shqiptarëve të Luginës së Preshevës është në pozitë jashtëzakonisht të vështirë, si rezultat i politikës së Qeverisë serbe, prandaj unifikimin e faktorit politik shqiptarë e sheh të domosdoshëm.

Parimisht do të duhej të ishim kundër çfarëdo zgjedhjeve pa zgjidhje politike për shqiptarët e Luginës në Serbi. Në këto rrethana të rënda politike e ekonomike, ku përsëritja e shpeshtë e zgjedhjeve synon të dekurajojë elektoratin e shqiptarëve për pjesëmarrje në zgjedhje, ne kemi konsideruar të domosdoshëm unifikimin e faktorit politik shqiptarë si përgjigjen e duhur ndaj mosnënshtrimit dhe mosdorëzimit ndaj represionit shtetëror serb.

Preshevë, 08 nëntor 2023
Këshilli iniciativ i Aleancës për Luginën

ARTIKUJT E NGJASHËM

APN fton mbledhje të kryesisë për sot në orën 20:00

PreshevaPRESS

PVD dhe PDSH kanë arritur marrëveshje për bashkëqeverisje në Preshevë

PreshevaPRESS

Dokument / Nënshkruhet marrëveshja e koalicionit qeverisës në Bujanoc

PreshevaPRESS