Një aksident me pasojë vdekjen e një biçiklisti ka ndodhur mbrëmjen e djeshme në rrugën lokale mes fshatrave Leran dhe Geraj, në afërsi të Preshevës.
Sipas të dhënave të konfirmuara nga Policia e Vranjës, viktima është një 54-vjeçar nga fshati Ashanë i komunës së Preshevës, i cili po udhëtonte me biçikletë kur u përplas nga një automjet në lëvizje. Nga goditja e fuqishme, ai ka pësuar lëndime të rënda dhe ka ndërruar jetë në vendngjarje.
Shoferi i automjetit është larguar nga vendi i aksidentit dhe policia po zhvillon një hetim intensiv për identifikimin dhe kapjen e tij.
Ngjarja ka ndodhur rreth orës 20:00 të mbrëmjes së djeshme në segmentin e vjetër të magjistrales Preshevë–Bujanoc, afër fshatit Geraj.
Banorët e zonës shprehen të tronditur nga rasti dhe theksojnë se kjo rrugë është shumë e frekuentuar, por shpeshherë e pasigurt për biçiklistët dhe këmbësorët për shkak të mungesës së ndriçimit dhe infrastrukturës mbrojtëse.
Hetimet po vazhdojnë për të zbardhur plotësisht rrethanat e kësaj tragjedie dhe për të përcaktuar përgjegjësinë ligjore.