Dje në hapësirën e Kuvendit të Komunës së Preshevës është prezentuar plani i detajuar strategjik, modeli i menaxhimit dhe identiteti i ri vizual për Zonën Industriale “Çukarka”.
Në këtë prezantim ishin prezent përfaqësues të vendimmarrjes lokale dhe partnerët ndërkombëtarë, përfaqësues të agjencisë UNOPS, të cilët kanë mbështetur këtë proces.
Thelbi i prezantimit ishte ndryshimi i paradigmës së trajtimit të pronës komunale, strategji e cila synon transformimin e Zonës Industriale “Çukarka” nga një parcelë e thjeshtë ndërtimore në një “produkt investiv” të rregulluar, të sigurt dhe të gatshëm për treg.
Në prezantim u detajua se zona është e projektuar për të mbështetur logjistikën moderne, infrastruktura e së cilës përfshin:
- Modelin “Neutral Host” për telekomunikacion, ku komuna ndërton infrastrukturën pasive optike për të gjithë operatorët.
- Siguri të Integruar: Përdorimin e kamerave me analitikë dhe njohje të targave (ANPR) për siguri maksimale.
- Efiçencë Energjetike: Ndriçim inteligjent LED dhe përgatitje për energji të rinovueshme.
Ndërtim Modular: Inkurajimi i objekteve montazhore për hyrje të shpejtë në treg dhe fleksibilitet.
Pjesë e prezantimit ishte edhe lançimi i identitetit vizual të zonës, me logon e re moderne dhe sloganin “Logjistikë. Shpejtësi. Investim i Sigurt”.
Ky takim është vazhdimsi e një procesi mbi 20 vjeçar që nga fillimi i investimeve në këtë zonë e që ende nuk po i shihet fundi.