Kryetari i Bujanocit, Arber Pajaziti, ka shprehur falënderimet e tij të sinqerta për angazhimin e presidentes së Kosovës, Vjosa Osmani, në avokimin e çështjes së shqiptarëve të Luginës së Preshevës në arenën ndërkombëtare.
“Shpreh falënderimet e mia të sinqerta për angazhimin e presidentes së Kosovës znj. Vjosa Osmani, për angazhimin e vazhdueshëm dhe të vendosur në avokimin e çështjes së shqiptarëve të Luginës në arenën ndërkombëtare,” tha Pajaziti.
Ai theksoi se përkushtimi i presidentes për trajtimin serioz dhe me përgjegjësi të çështjes së shqiptarëve të Luginës në institucionet e Shteteve të Bashkuara të Amerikës, përfshirë takimet dhe komunikimin e drejtpërdrejtë me zyrtarë të lartë të Departamentit Amerikan të Shtetit, përbën një hap të rëndësishëm drejt ndërkombëtarizimit të padrejtësive që ata përballen.
Pajaziti gjithashtu vuri në dukje fjalimin e presidentes Osmani në Këshillin e Sigurimit të Kombeve të Bashkuara, duke e cilësuar atë si një “akt të guximshëm shtetëror dhe një moment me peshë të veçantë politike.” Sipas tij, ky adresim, i mbështetur nga angazhimi diplomatik paraprak me partnerët amerikanë, ka vendosur çështjen e shqiptarëve të Luginës në vëmendjen e faktorit ndërkombëtar në një nivel më serioz.
“Kjo dëshmon se Republika e Kosovës mbetet e përkushtuar në mbrojtjen e të drejtave të shqiptarëve kudo që ata jetojnë dhe se Lugina ka një zë të fuqishëm e të dinjitetshëm në përfaqësimin më të lartë shtetëror,” tha Pajaziti.
Ai përfundoi me një falënderim për presidenten Osmani dhe bashkëpunëtorët e saj për mbështetjen dhe rolin aktiv në afirmimin e të drejtave dhe aspiratave legjitime të shqiptarëve të Luginës.